Minggu, 15 Oktober 2017

Serat Asmaralaya (1908)






Serat Asmaralaya  (1908)  

Mas Ngabehi Mangoenwidjaja  (1866–1915)

Nederlandsch Bijbelgenootschap (Amsterdam)

꧅ꦚ꧀ꦖ꧅ ꦩꦔꦺꦱ꧀ꦛꦶꦮꦿꦸꦃꦱꦿꦶꦫꦺꦁꦲꦾꦁꦄꦂꦠꦠꦶ꧈​ꦠꦼ
ꦠꦸꦩꦤꦼꦤ꧀ꦥꦠꦼꦩꦺꦴꦤ꧀ꦮꦂꦠꦚ꧈​ ꦠꦤ꧀ꦥꦥꦤ꧀ꦠꦫꦤ꧀ꦤꦶꦏ꧀ꦩ
ꦠꦺ꧈​ ꦱꦺꦴꦂꦭꦔꦼꦤꦶꦁꦱꦭꦸꦭꦸꦠ꧀ ꦩꦂꦩꦤꦶꦫꦏꦁꦱꦩ꧀ꦥꦸ
ꦤ꧀ꦲꦸꦤꦶꦁ꧈​ ꦏꦱꦠ꧀ꦩꦠꦲꦶꦁꦤꦺꦠꦾ꧈​ ꦱꦸꦩꦺꦃꦱꦼꦩꦸꦤꦶꦥꦸꦤ꧀
ꦲꦪꦼꦩ꧀ꦠꦼꦤ꧀ꦠꦽꦩ꧀ꦲꦤꦫꦶꦩ꧈​ ꦩꦸꦁꦏꦸꦂꦩꦫꦶꦁꦏꦫꦩꦺꦤ꧀ꦩꦸꦁꦲꦩ
ꦭꦠ꧀ꦱꦶꦃ꧈​ ꦱꦶꦲꦶꦁꦲꦾꦁꦱꦸꦏ꧀ꦱ꧀ꦩꦤꦱ꧉​ ꧄ ꦔꦸꦚ꧀ꦗꦫ
ꦫꦶꦁꦉꦫꦱꦤ꧀ꦠꦤ꧀ꦲꦫꦶꦱ꧀ ꦱꦤꦶꦠꦾꦱꦱꦸꦁꦱꦽꦥꦶꦁꦱꦱꦩ꧈​ ꦱ
ꦫꦺꦃꦱꦤꦶꦱ꧀ꦏꦫꦤꦶꦁꦫꦺꦃ꧈​ ꦫꦶꦫꦶꦃꦥꦫꦩꦂꦠꦫꦸꦩ꧀ ꦱꦤ꧀ꦠ
ꦧꦸꦢꦾꦱꦸꦱꦼꦠꦾꦺꦁꦏꦥ꧀ꦠꦶ꧈​ ꦏꦠꦼꦤ꧀ꦠꦩꦺꦠꦺꦴꦠꦩꦤ꧀
ꦠꦼꦠꦼꦏ꧀ꦱꦤ꧀ꦠꦺꦴꦱꦠꦸꦭ꧀ ꦱꦏꦶꦁꦠꦾꦱꦺꦮꦸꦱ꧀ꦥꦿꦤ
ꦮ꧈​ ꦲꦤꦫꦮꦁꦩꦤꦿꦸꦱꦶꦁꦥꦿꦩꦤꦮꦼꦤꦶꦁ꧈​ ꦮꦿꦸꦃꦤꦼꦔꦶꦁꦏ
ꦤꦶꦔꦤ꧀꧈​ ꧄ ꦮꦶꦮꦫꦤꦶꦁꦮꦫꦤꦏꦁꦮꦼꦫꦶꦠ꧀ ꦏꦶꦤ
ꦮꦿꦸꦲꦤ꧀ꦮꦼꦔꦤꦺꦠꦤ꧀ꦱꦩꦂ꧈​ ꦏꦱꦫꦶꦫꦱꦴꦫꦶꦤꦺ꧈​
ꦮꦿꦸꦃꦫꦲꦪꦸꦤꦶꦁꦭꦸꦪꦸꦠ꧀ ꦪꦶꦠ꧀ꦤꦤꦺꦴꦫꦏꦺꦮꦿꦤ꧀ꦲꦶꦁꦮꦺ
ꦱ꧀ꦛꦶ꧈​ ꦩꦁꦏꦤꦏꦁꦮꦱ꧀ꦏꦶꦛ꧈​ ꦩꦂꦩꦢꦺꦤ꧀ꦲꦁꦒꦪꦸꦃ꧈​ ꦮꦃ
ꦪꦸꦲꦪꦸꦤꦶꦁꦏꦱꦶꦢꦤ꧀ ꦪ꧀ꦮꦏꦠꦸꦁꦏꦸꦭ꧀ꦲꦸꦭꦃꦏꦩꦸ
ꦭꦾꦤꦶꦁꦲꦸꦫꦶꦥ꧀ ꦠꦤ꧀ꦲꦸꦫꦸꦥ꧀ꦏꦶꦤꦸꦉꦥꦤ꧀꧈​ ꧄ ꦗꦠꦶ
ꦤꦶꦫꦲꦤꦤꦶꦁꦲꦸꦫꦶꦥ꧀ ꦤꦺꦴꦫꦭꦩꦧꦼꦧꦱꦤꦺ
ꦲꦤ꧈​​ꦲꦩꦸꦁ​ꦱꦒꦼꦧꦾꦫꦶꦁ​ꦕ꧀ꦭꦺꦫꦺꦠ꧀꧈​​ꦥꦼꦠ꧀​ꦠꦸꦩꦸꦭ​ꦮꦁꦱꦸꦭ꧀꧈​​ꦧꦒꦾ​ꦭꦩꦸꦤ꧀​ꦏꦁ​ꦧꦁꦏꦶꦠ꧀​ꦧꦭꦶ꧈​​ꦩꦫꦶꦁ​ꦲꦭꦩꦺ​ꦭꦩ꧈​​ꦏꦁ​ꦭꦸꦮꦶꦃ​ꦭꦶꦤꦸꦲꦸꦁ꧈​​ꦮꦶꦠ꧀​ꦒꦲꦶꦧ꧀​ꦏꦁ​ꦢꦸꦫꦸꦁ​ꦮꦶꦏꦤ꧀꧈​​ꦏꦁ​ꦮꦸꦱ꧀​ꦠꦩ꧀ꦠꦸ​ꦥꦼꦠꦼꦁ​ꦕꦭꦺꦫꦺꦠ꧀​ꦲꦸꦩꦚ꧀ꦗꦶꦁ꧈​​ꦱꦸꦮꦸꦁ​ꦮꦺꦴꦫꦶꦁ​ꦱ꧀ꦮꦱꦤ꧉​​
ꦪꦪꦃ​ꦊꦧꦸ​ꦏꦠꦶꦪꦸꦥ꧀​ꦲꦶꦁ​ꦲꦔꦶꦤ꧀꧈​​ꦥꦫꦤ꧀​ꦏꦸꦭꦸꦥ꧀​ꦪꦺꦤ꧀​ꦤꦺꦁ​ꦏꦺꦴꦤꦺꦴ​ꦱꦶꦫ꧈​​ꦏꦱꦁꦱꦪ​ꦱꦭꦮꦱꦺ꧈​​ꦲꦮꦶꦠ꧀​ꦮꦼꦮꦫꦲꦶꦥꦸꦤ꧀꧈​​ꦮꦽꦢꦠꦩ​ꦏꦁ​ꦮꦸꦱ꧀​ꦩꦸꦩ꧀ꦥꦸꦤꦶ꧈​​ꦪꦺꦤ꧀​ꦩꦫꦶꦁ​ꦱꦸꦮꦸꦁ​ꦱꦶꦫ꧈​​ꦩꦸꦁ​ꦥꦼꦠꦼꦁ​ꦠꦶꦤꦼꦩꦸ꧈​​ꦠꦤ꧀ꦥ​ꦠꦼꦥꦶ​ꦏꦠꦼꦩꦲꦤ꧀꧈​​ꦠꦸꦗꦸ​ꦥꦝꦁ​ꦏꦼꦤ​ꦒꦼꦧꦾꦫꦶꦁ​ꦲꦾꦁ​ꦫꦮꦶ꧈​​ꦩꦮ​ꦥꦿꦧꦮ​ꦥꦤꦱ꧀꧉​​
ꦏꦲꦶꦁꦏꦼꦠꦤ꧀​ꦱꦸꦂꦪ​ꦥꦼꦠꦼꦁ​ꦩꦭꦶꦃ꧈​​ꦲꦤ​ꦲꦸꦒ​ꦱꦸꦤꦫꦶꦁ​ꦱꦱꦁꦏ꧈​​ꦤꦔꦶꦁ​ꦩꦸꦁ​ꦱꦮꦠꦫꦤꦺ꧈​​ꦠꦸꦂ​ꦩꦮ​ꦥꦿꦧꦮ​ꦧꦸꦤ꧀꧈​​ꦱꦔꦼꦠ꧀​ꦲꦱꦽꦥ꧀​ꦏꦫꦱꦺꦁ​ꦝꦶꦫꦶ꧈​​ꦪꦺꦤ꧀​ꦱꦶꦫ​ꦩꦿꦶꦁ​ꦱ꧀ꦮꦱꦤ꧈​​ꦱ꧀ꦮꦱꦤ​ꦥꦸꦤꦶꦏꦸ꧈​​ꦲꦩꦸꦁ​ꦲꦔꦶꦤ꧀​ꦲꦤꦤꦶꦫ꧈​​ꦮꦺꦴꦂ​ꦲꦭꦸꦱꦶꦁ​ꦥꦺꦴꦤꦁ​ꦠꦶꦂꦠ​ꦭꦮꦤ꧀​ꦲꦒ꧀ꦤꦶ꧈​​ꦠꦸꦂ​ꦲꦸꦒ​ꦩꦏ꧀ꦱꦶꦃ​ꦏꦼꦤ꧉​​
ꦮꦸꦮꦸꦃ​ꦱꦸꦤꦫꦶꦁ​ꦱꦸꦂꦪ​ꦭꦤ꧀​ꦱꦱꦶ꧈​​ꦥꦫꦤ꧀​ꦏꦸꦭꦸꦥ꧀​ꦱꦺꦴꦭꦲꦶꦫ​ꦧꦺꦚ꧀ꦗꦁ꧈​​ꦠꦤ꧀ꦱꦃ​ꦥꦤꦱ꧀​ꦲꦱꦽꦥ꧀​ꦧꦲꦺ꧈​​ꦩꦾꦁ​ꦏꦠꦶꦪꦸꦥꦶ​ꦧꦪꦸ꧈​​ꦲꦔꦭꦪ​ꦔꦸꦧꦼꦔꦶ​ꦭꦔꦶꦠ꧀꧈​​ꦲꦔꦶꦚ꧀ꦗꦼꦁ​
​ꦠꦤ꧀ꦥ​ꦱꦺꦴꦠꦾ꧈​​ꦲꦶꦏꦸ​ꦲꦫꦤꦶꦥꦸꦤ꧀꧈​​ꦏꦂꦱ​ꦔꦸꦁꦱꦶ​ꦔꦼꦤ꧀ꦢꦶ​ꦱꦶꦫ꧈​​ꦠꦿꦶꦭꦺꦴꦏꦪ​ꦏꦼꦧꦏ꧀​ꦏꦭꦶꦩ꧀ꦥꦸꦠꦤ꧀​ꦢꦺꦤꦶꦁ꧈​​ꦲꦶꦁ​ꦱꦸꦮꦸꦁ​ꦩꦾꦁ​ꦱ꧀ꦮꦱꦤ꧉​​
ꦭꦪꦏ꧀​ꦭꦩꦸꦤ꧀​ꦏꦁ​ꦢꦸꦫꦸꦁ​ꦲꦸꦢꦤꦶ꧈​​ꦲꦂꦱ​ꦩꦉꦩ꧀​ꦤꦺꦁ​ꦱꦸꦮꦸꦁ​ꦏꦺꦮꦭ꧈​​ꦢꦸꦩꦺꦃ​ꦩꦼꦁꦏꦸ​ꦱꦏꦧꦺꦲꦺ꧈​​ꦠꦤ꧀​ꦮꦿꦸꦃ​ꦭꦩꦸꦤ꧀​ꦥꦸꦤꦶꦏꦸ꧈​​ꦥꦼꦠꦼꦁ​ꦏꦼꦩ꧀ꦥꦸꦠ꧀​ꦠꦤ꧀ꦥ​ꦮꦠꦮꦶꦱ꧀꧈​​ꦏꦁ​ꦉꦩ꧀ꦥꦶꦠ꧀​ꦏꦭꦶꦩ꧀ꦥꦸꦠꦤ꧀꧈​​ꦠꦼꦩꦃ​ꦚꦤꦸꦏ꧀​ꦚꦤꦸꦏ꧀꧈​​ꦮꦼꦤꦺꦃ​ꦲꦔꦁꦒꦼꦥ꧀​ꦱ꧀ꦮꦱꦤ꧈​​ꦢꦸꦩꦺꦃ​ꦲꦭꦸꦱ꧀​ꦲꦔ꧀ꦭꦶꦩ꧀ꦥꦸꦠꦶ​ꦒꦤꦭ꧀​ꦲꦭꦶꦠ꧀꧈​​ꦊꦩ꧀ꦧꦸꦠ꧀​ꦔꦺꦧꦼꦏꦶ​ꦗꦒꦢ꧀꧉​​
ꦤꦔꦶꦁ​ꦠꦤ꧀​ꦮꦿꦸꦃ​ꦪꦺꦤ꧀​ꦲꦶꦏꦸ​ꦠꦿꦶꦩꦸꦂꦠꦶ꧈​​ꦠꦿꦶ​ꦠꦼꦠꦼꦭꦸ​ꦩꦸꦂꦠꦶ​ꦏꦴꦭꦸꦱꦤ꧀꧈​​ꦲꦭꦸꦱ꧀​ꦠꦼꦠꦼꦭꦸ​ꦠꦼꦒꦼꦱꦺ꧈​​ꦭꦶꦫꦶꦁ​ꦲꦭꦸꦱ꧀​ꦠꦼꦠꦼꦭꦸ꧈​​ꦲꦝꦼꦩ꧀​ꦥꦤꦱ꧀​ꦏꦭꦮꦤ꧀​ꦲꦔꦶꦤ꧀꧈​​ꦲꦶꦏꦸ​ꦲꦤꦤꦶꦁ​ꦲꦮ꧈​​ꦔꦸꦤꦶ​ꦲꦱꦭꦶꦥꦸꦤ꧀꧈​​ꦲꦶꦁꦏꦁ​ꦥꦤꦱ꧀​ꦱꦏꦶꦁ​ꦱꦸꦂꦪ꧈​​ꦲꦶꦁꦏꦁ​ꦲꦱꦽꦥ꧀​ꦲꦱꦭ꧀​ꦱꦏꦶꦁ​ꦱꦶꦠꦉꦱ꧀ꦩꦶ꧈​​ꦲꦔꦶꦤ꧀​ꦱꦏꦶꦁ​ꦠꦿꦁꦒꦤ꧉​​
​ꦠꦠꦤꦶꦁ​ꦏꦁ​ꦱꦸꦂꦪ​ꦭꦶꦤ꧀ꦠꦁ​ꦱꦱꦶ꧈​​ꦱꦩꦾ​ꦩꦸꦧꦼꦁ​ꦚꦏꦿ​ꦩꦒꦶꦭꦶꦔꦤ꧀꧈​​ꦲꦸꦫꦸꦤ꧀​ꦥꦿꦧꦮ​ꦏꦠꦿꦶꦤꦺ꧈​​ꦮꦺꦴꦂ​ꦢꦢꦾ​ꦱ꧀ꦮꦱꦤꦺꦏꦸ꧈​​ꦩꦁꦏ​ꦮꦿꦤꦤꦶꦫ​ꦃꦪꦁ​ꦮꦶꦢꦶ꧈​​ꦢꦺꦫ​ꦩꦂꦤꦺꦁ​ꦏꦴꦤꦤ꧀꧈​​ꦱꦺꦱꦶꦤꦶꦁ​ꦫꦠ꧀​ꦱꦒꦸꦁ꧈​​ꦢꦸꦩꦸꦤꦸꦁ​ꦩꦿꦶꦁ​ꦱꦸꦮꦸꦔꦶꦫ꧈​​
ꦭꦶ​ꦱꦼꦱꦺꦴꦠꦾ​ꦩꦸꦁꦒꦶꦁ​ꦲꦼꦩ꧀ꦧꦤꦤ꧀​ꦱꦭꦩꦶ꧈​​ꦠꦤ꧀​ꦏꦼꦤ​ꦥꦶꦤꦶꦱꦃꦤ꧉​​
​ꦩꦤ꧀ꦠꦸꦏ꧀​ꦠꦼꦠꦼꦥ꧀​ꦠꦤ꧀ꦥ​ꦏꦂꦠꦶꦤꦺꦏꦶ꧈​​ꦏꦩꦺꦴꦠ꧀​ꦩꦺꦴꦩꦺꦴꦠ꧀​ꦲꦩꦺꦴꦁ​ꦲꦩꦶꦱꦺꦱ꧈​​ꦱꦲꦶꦱꦶꦤꦶꦁ​ꦗꦒꦢ꧀​ꦏꦧꦺꦃ꧈​​ꦧꦸꦩꦶ​ꦧꦫꦸꦤ​ꦏ꧀ꦭꦼꦧꦸ꧈​​ꦤꦺꦴꦫ​ꦩꦿꦺꦴꦗꦺꦴꦭ꧀​ꦱꦏꦶꦁ​ꦠꦿꦶꦩꦸꦂꦠꦶ꧈​​ꦲꦶꦱꦶꦤꦺ​ꦏꦲꦶꦱꦺꦤꦤ꧀꧈​​ꦲꦶꦁ​ꦱꦴꦤꦤꦶꦥꦸꦤ꧀꧈​​ꦲꦔ꧀ꦭꦶꦩ꧀ꦥꦸꦠꦶ​ꦏꦭꦶꦩ꧀ꦥꦸꦠꦤ꧀꧈​​ꦥꦼꦥꦼꦠ꧀​ꦠꦤ꧀ꦥ​ꦮꦠꦼꦱꦤ꧀​ꦥꦼꦤꦸꦃ​ꦠꦿꦶꦩꦸꦂꦠꦶ꧈​​ꦠꦸꦲꦸ​ꦲꦩꦶꦱꦺꦱꦺꦁ​ꦫꦠ꧀꧉​​
​ꦠꦿꦶꦭꦺꦴꦏꦪ​ꦠꦤ꧀​ꦲꦤ​ꦏꦁ​ꦩꦶꦫꦶꦥ꧀꧈​​ꦭꦶꦂ​ꦱ꧀ꦮꦱꦤ​ꦥꦿꦤ꧀ꦢꦺꦤꦺ​ꦥꦸꦤꦶꦏ꧈​​ꦩꦏ꧀ꦱꦶꦃ​ꦏꦮꦸꦭ​ꦗꦠꦶꦤꦺ꧈​​ꦏꦠꦤ꧀ꦝ​ꦲꦤꦤꦶꦥꦸꦤ꧀꧈​​ꦢꦸꦫꦸꦁ​ꦭꦁꦒꦼꦁ​ꦤꦺꦴꦫ​ꦤꦼꦁ​ꦲꦼꦤꦶꦁ꧈​​ꦥꦤ꧀​ꦩꦏ꧀ꦱꦶꦃ​ꦢꦂꦧꦺ​ꦲꦺꦴꦧꦃ꧈​​ꦏꦼꦤ​ꦱꦸꦢ​ꦮꦸꦮꦸꦃ꧈​​ꦠꦼꦠꦼꦥ꧀​ꦩꦸꦁ​ꦧꦁꦱ​ꦥꦶꦫꦤ꧀ꦠꦾ꧈​​ꦢꦢꦶ​ꦢꦸꦢꦸ​ꦲꦤꦤꦺ​ꦏꦴꦤꦤ꧀​ꦗꦠꦶ꧈​​ꦗꦠꦶ​ꦗꦠꦶꦤꦶꦁ​ꦒꦼꦱꦁ꧉​​
​ꦧꦭꦶꦏ꧀​ꦏꦁ​ꦫꦤ꧀​ꦱꦗꦠꦶꦤꦶꦁ​ꦲꦸꦫꦶꦥ꧀꧈​​ꦱꦪꦼꦏ꧀ꦠꦶꦤꦺ​ꦩꦼꦤꦼꦁ​ꦤꦺꦴꦫ​ꦲꦺꦴꦧꦃ꧈​​ꦤꦔꦶꦁ​ꦲꦶꦁꦏꦁ​ꦲꦺꦴꦧꦃ​ꦏꦧꦺꦃ꧈​​ꦪꦺꦤ꧀​ꦤꦺꦴꦫ​ꦭꦤ꧀​ꦤꦼꦔꦶꦥꦸꦤ꧀꧈​​ꦮꦸꦫꦸꦁ​ꦤꦺꦴꦫ​ꦱꦶꦢ​ꦲꦩꦺꦴꦱꦶꦏ꧀꧈​​ꦭꦤ꧀​ꦠꦤ꧀​ꦫꦸꦥ​ꦠꦤ꧀​ꦮꦂꦤ꧈​​ꦤꦔꦶꦁ​ꦗꦠꦶꦤꦶꦥꦸꦤ꧀꧈​​ꦱꦧꦼꦤ꧀​ꦱꦧꦼꦤ꧀​ꦲꦤ​ꦮꦂꦤ꧈​​ꦥꦤ꧀​ꦮꦸꦱ꧀​ꦭꦮꦤ꧀​ꦫꦸꦥꦤꦶꦫ​ꦏꦁ​ꦱꦗꦠꦶ꧈​​ꦏꦭꦩꦸꦤ꧀​ꦠꦤ꧀ꦥ​
​ꦫꦸꦥ꧉​​
​ꦪꦠ꧀ꦤꦤꦤ​ꦪꦼꦏ꧀ꦠꦶ​ꦤꦺꦴꦫ​ꦮꦂꦤꦶ꧈​​ꦮꦂꦤ​ꦫꦸꦥ​ꦤꦺꦴꦫ​ꦧꦶꦱ​ꦥꦶꦱꦃ꧈​​ꦮꦂꦤ​ꦮꦫꦤ​ꦠꦼꦒꦼꦱꦺ꧈​​ꦫꦸꦥ​ꦲꦸꦫꦶꦥ꧀​ꦱꦠꦸꦲꦸ꧈​​ꦢꦢꦶ​ꦮꦂꦤ​ꦏꦧꦺꦃ​ꦥꦸꦤꦶꦏꦶ꧈​​ꦠꦼꦠꦼꦥ꧀​ꦮꦫꦤꦺꦁ​ꦒꦼꦱꦁ꧈​​ꦏꦁ​ꦩꦶꦱꦺꦱꦺꦁ​ꦱꦸꦮꦸꦁ꧈​​ꦱꦸꦮꦸꦁ​ꦏꦁ​ꦮꦺꦴꦫꦶꦁ​ꦗꦶꦮꦁꦒ꧈​​ꦲꦸꦭꦠꦤ​ꦱꦸꦩꦶꦔꦶꦠꦺ​ꦲꦤꦺꦁ​ꦔꦼꦤ꧀ꦢꦶ꧈​​ꦲꦗ​ꦩꦸꦕꦸꦁ​ꦏꦺꦮꦭ꧉​​  
꧅ꦟ꧀ꦢꦿ꧅
ꦔꦸꦤꦶ​ꦲꦶꦁꦱꦸꦤ꧀​ꦔꦼꦔ꧀ꦭꦼꦁ​ꦲꦶꦁ​ꦠꦾꦱ꧀​ꦥꦸꦔꦸꦤ꧀​ꦥꦸꦔꦸꦤ꧀꧈​​ꦔꦸꦢꦶ​ꦲꦤꦤꦶꦁ​ꦲꦾꦁ꧈​​ꦒꦾ​ꦥꦿꦸꦲꦶꦠ​ꦥꦿ​ꦩꦲꦂꦱꦶ꧈​​ꦮꦼꦮꦫꦲꦺ​ꦠꦤ꧀​ꦱꦩ​ꦲꦮꦂꦤ​ꦮꦂꦤ꧉​​
ꦲꦤ​ꦮꦶꦏꦸ​ꦩꦼꦝꦂ​ꦲꦤꦤꦶꦁ​ꦲꦾꦁ​ꦄꦒꦸꦁ꧈​​ꦪꦲꦶꦏꦸ​ꦕꦃꦪꦤ꧀ꦠ꧈​​ꦏꦁ​ꦔ꧀ꦭꦶꦩ꧀ꦥꦸꦠꦶ​ꦮꦺꦴꦫꦶꦁ​ꦝꦶꦫꦶ꧈​​ꦮꦪꦔꦤ꧀ꦚ​ꦢꦸꦩꦸꦤꦸꦁ​ꦤꦺꦁ​ꦤꦺꦠꦿꦤꦶꦫ꧉​​
ꦧꦸꦤ꧀ꦢꦼꦂ​ꦔꦸꦮꦸꦁ​ꦭꦶꦂ​ꦱꦸꦤꦫꦶꦁ​ꦱꦸꦂꦪ​ꦤꦿꦮꦸꦁ꧈​​ꦲꦫꦤ꧀​ꦤꦸꦂ​ꦩꦸꦑꦩꦠ꧀꧈​​ꦪꦺꦤ꧀​ꦥꦿꦥ꧀ꦠ​ꦲꦤ꧀ꦠꦫꦺꦁ​ꦥꦠꦶ꧈​​ꦲꦶꦏꦸ​ꦱꦸꦉꦩ꧀​ꦪꦺꦤ꧀​ꦱꦶꦉꦥ꧀​ꦱꦶꦫ​
ꦩꦂꦩꦤꦶꦥꦸꦤ꧀​ꦪꦺꦤ꧀​ꦮꦸꦱ꧀​ꦱꦸꦫꦸꦠ꧀​ꦲꦸꦫꦸꦥꦶꦥꦸꦤ꧀꧈​​ꦲꦪ꧀ꦮ​ꦮꦱ꧀​ꦱꦸꦩꦼꦭꦁ꧈​​ꦭꦶꦁ​ꦭꦶꦔꦼꦤ꧀​ꦪ꧀ꦮ​ꦏꦺꦴꦁꦱꦶ​ꦭꦭꦶ꧈​​ꦥꦶꦭꦸꦠꦤꦼꦤ꧀​ꦲꦶꦁ​ꦏꦺꦴꦤꦺꦴ​ꦒ꧀ꦮꦤꦶꦁ​ꦏꦩꦸꦭꦾꦤ꧀꧉​​
ꦲꦤ​ꦩꦸꦮꦸꦱ꧀​ꦮꦺꦴꦱꦶꦁ​ꦒꦼꦱꦁ​ꦱꦪꦼꦏ꧀ꦠꦶ​ꦮꦸꦱ꧀꧈​​ꦏꦮꦱꦺꦱꦺꦁ​ꦱꦶꦫ꧈​​ꦮꦺꦴꦫꦶꦁ​ꦱꦫꦶꦫ​ꦫꦶ​ꦫꦠꦿꦶ꧈​​ꦲꦶꦪ​ꦲꦶꦏꦸ​ꦫꦱ​ꦭꦤ꧀​
ꦥꦔꦿꦱꦤꦶꦫ꧉​​
ꦮꦺꦴꦂ​ꦱꦮꦸꦗꦸꦢ꧀​ꦤꦺꦁ​ꦤꦥꦱ꧀​ꦲꦤ꧀ꦥꦱ꧀​ꦠꦤ꧀​ꦤꦸꦥꦸꦱ꧀꧈​​ꦥꦿꦠꦤ꧀ꦝꦤꦺ​ꦲꦤ꧈​​ꦪꦺꦤ꧀​ꦤꦥꦱꦶꦫ​ꦮꦸꦱ꧀​ꦲꦤꦶꦱ꧀꧈​​ꦪꦼꦏ꧀ꦠꦶ​ꦱꦶꦂꦤ​ꦲꦠ꧀ꦩꦤꦶꦫ​ꦱꦏꦶꦁ​ꦫꦒ꧉​​
ꦩꦂꦩꦤꦶꦁꦥꦸꦤ꧀​ꦪꦺꦤ꧀​ꦱꦶꦫ​ꦪꦸꦤ꧀​ꦥꦿꦥ꧀ꦠꦺꦁ​ꦭꦸꦪꦸꦠ꧀꧈​​ꦲꦪ꧀ꦮ​ꦏꦭꦪꦠꦤ꧀꧈​​ꦲꦺꦴꦱ꧀ꦮꦤ꧀ꦠ​ꦫꦕꦸꦠꦼꦤ꧀​ꦤꦸꦭꦶ꧈​​ꦮꦺꦴꦂꦤ​ꦭꦮꦤ꧀​ꦫꦱ​ꦭꦤ꧀​ꦥꦔꦿꦱꦤꦶꦫ꧉​​
ꦥꦔꦿꦱꦺꦏꦸ​ꦲꦤꦤꦺ​ꦒꦸꦱ꧀ꦠꦶ​ꦱꦱ꧀ꦠꦸ꧈​​ꦏꦮꦸꦭ​ꦫꦱꦤ꧀ꦠ꧈​​ꦪꦺꦤ꧀​ꦫꦱ​ꦭꦤ꧀​ꦥꦔꦿꦱ​ꦮꦶꦱ꧀꧈​​ꦮꦺꦴꦂ​ꦱꦗꦸꦒ​ꦠꦼꦠꦼꦥ꧀​ꦲꦶꦁ​ꦥꦤꦸꦁꦒꦭꦶꦫ꧉​​
ꦱꦶꦂꦤ​ꦱꦩ꧀ꦥꦸꦤ꧀​ꦠꦤ꧀ꦥ​ꦫꦱ​ꦥꦔꦿꦱ​ꦮꦸꦱ꧀꧈​​ꦩꦸꦭꦶꦃ​ꦩꦸꦭꦤꦶꦫ꧈​​ꦢꦸꦏ꧀​ꦱꦶꦫ​ꦢꦸꦫꦸꦁ​ꦢꦸꦩꦢꦶ꧈​​ꦧꦭꦶ​ꦤꦼꦁ​ꦤꦶꦁ​ꦤꦺꦴꦫ​ꦩꦸꦤꦶ​ꦤꦺꦴꦫ​ꦩꦸꦤ꧉​​
​ꦮꦼꦤꦺꦃ​ꦩꦸꦮꦸꦱ꧀​ꦗꦠꦶꦤꦺ​ꦏꦁ​ꦩꦸꦂꦮꦺꦁ​ꦲꦶꦝꦸꦥ꧀꧈​​ꦪꦲꦶꦏꦸ​ꦥꦿꦩꦤ꧈​​ꦏꦁ​ꦩꦱꦺꦱ​ꦲꦶꦁ​ꦱꦏꦭꦶꦂ꧈​​ꦢꦸꦩꦸꦤꦸꦁꦚ​ꦤꦺꦁ​ꦈꦠꦾꦏ​ꦒꦸꦫꦸꦭꦺꦴꦏ꧉​​
​ꦲꦶꦪ​ꦲꦶꦏꦸ​ꦠꦼꦩ꧀ꦧꦸꦁ​ꦄꦫꦧ꧀​ꦧꦺꦠꦭ꧀​ꦩꦏ꧀ꦩꦸꦂ꧈​​ꦠꦤ꧀ꦝꦤꦺ​ꦏꦁ​ꦚꦠ꧈​​ꦲꦤꦺꦁ​ꦒꦼꦧꦾꦫꦶꦁ​ꦥꦔꦺꦏ꧀ꦱꦶ꧈​​ꦭ꧀ꦮꦶꦃ​ꦮꦱ꧀ꦥꦢ​ꦮꦿꦸꦃ​ꦒꦸꦩ꧀ꦭꦫꦶꦁ​ꦲꦭꦩ꧀​ꦢꦸꦚ꧉​​
​ꦪꦺꦤ꧀​ꦥꦸꦤꦶꦏꦸ​ꦊꦉꦩ꧀​ꦱꦶꦫ​ꦤꦸꦭꦶ​ꦠꦸꦫꦸ꧈​​ꦪꦺꦤ꧀​ꦱꦶꦂꦤ​꧈​​ꦩꦸꦭꦤꦺ​ꦲꦺꦱ꧀ꦛꦶꦤꦺ​ꦏꦏꦶ꧈​​ꦩꦸꦁ​ꦥꦿꦩꦤ​ꦏꦁ​ꦧꦶꦱ​ꦤꦸꦤ꧀ꦠꦸꦤ꧀​ꦩꦿꦶꦁ​ꦱ꧀ꦮꦂꦒ꧉​​
꧇꧑꧓꧇​꧉​​ꦮꦼꦤꦺꦃ​ꦗꦩ꧀ꦲꦸꦂ​ꦲꦩꦂꦤ​ꦏꦁ​ꦩꦲ​ꦫꦸꦲꦸꦂ꧈​​ꦪꦲꦶꦏꦸ​ꦱꦸꦮꦫ꧈​​ꦏꦁ​ꦏꦸꦮꦱ​ꦩꦸꦂꦮꦺꦁ​ꦲꦸꦫꦶꦥ꧀꧈​​ꦥꦿꦠꦤ꧀ꦝꦤꦺ​ꦭꦩꦸꦤ꧀​ꦱꦶꦂꦤ​ꦱ꧀ꦮꦫꦤꦶꦫ꧉​​
​ꦥꦿꦥ꧀ꦠꦺꦁ​ꦭꦩ꧀ꦥꦸꦱ꧀​ꦩꦼꦤꦼꦁ​ꦤꦺꦴꦫ​ꦧꦶꦱ​ꦩꦸꦮꦸꦱ꧀꧈​​ꦱꦮꦼꦤꦺꦃ​ꦥꦤ꧀ꦝꦶꦠ꧈​​ꦩꦼꦗꦁ​ꦲꦤꦤꦶꦁ​ꦲꦾꦁ​ꦮꦶꦢꦶ꧈​​ꦲꦶꦪ​ꦲꦶꦏꦸ​ꦲꦔꦼꦤ꧀​ꦲꦔꦼꦤ꧀​ꦧꦭꦺ​ꦲꦠ꧀ꦩ꧉​​
​ꦤꦺꦁ​ꦗꦿꦺꦴ​ꦗꦤ꧀ꦠꦸꦁ​ꦗꦼꦤꦏ꧀​ꦗꦼꦚ꧀ꦗꦼꦩ꧀​ꦲꦚ꧀ꦗꦼꦗꦁꦏꦸꦁ꧈​​ꦱꦏꦽꦗꦼꦠꦶꦁ​ꦱꦼꦗ꧈​​ꦫꦱ​ꦥꦔꦿꦱ​ꦕꦶꦥ꧀ꦠ​ꦱꦶꦂ꧈​​ꦥꦚ꧀ꦕꦩꦪ​ꦥꦚ꧀ꦕꦢꦿꦶꦪ​ꦏꦮꦱꦺꦱ꧉​​
​ꦩꦂꦩ​ꦪꦺꦤ꧀​ꦮꦸꦱ꧀​ꦥꦿꦥ꧀ꦠ​ꦲꦤ꧀ꦠꦫꦤꦶꦁ​ꦭꦩ꧀ꦥꦸꦱ꧀꧈​​ꦲꦔꦼꦤ꧀​ꦲꦔꦼꦤꦶꦫ꧈​​ꦤꦼꦁꦤ​ꦲꦪ꧀ꦮ​ꦩꦺꦴꦧꦃ​ꦩꦺꦴꦱꦶꦏ꧀꧈​​ꦫꦱꦤꦶꦫ​ꦱꦶꦂꦤꦏ꧀ꦤ​ꦩꦿꦶꦁ​ꦏꦺꦴꦤꦺꦴ​ꦥꦺꦴꦩ꧉​​
​ꦪꦼꦏ꧀ꦠꦶ​ꦤꦼꦩꦸ​ꦱꦗꦠꦶꦤꦺ​ꦏꦴꦤꦤ꧀ꦩꦸ꧈​​ꦠꦤ꧀​ꦱꦸꦱꦃ​ꦱꦶꦤꦼꦢꦾ꧈​​ꦥꦤ꧀​ꦮꦸꦱ꧀​ꦩꦁꦒꦶꦃ​ꦱꦮꦂꦒꦢꦶ꧈​​ꦠꦼꦩꦃ​ꦤꦶꦏ꧀ꦩꦠ꧀​ꦩꦸꦥ꦳ꦔꦠ꧀​ꦱꦭꦩꦶꦤꦶꦫ꧉​​
​ꦮꦼꦤꦺꦃ​ꦤꦸꦢꦸꦃ​ꦗꦠꦶꦤꦶꦁ​ꦲꦸꦫꦶꦥ꧀​ꦢꦸꦩꦸꦤꦸꦁ꧈​​ꦲꦤꦺꦁ​ꦱꦸꦭ꧀ꦧꦶꦤꦶꦫ꧈​​ꦥꦥꦤ꧀​ꦏꦤꦶꦏ꧀ꦩꦠꦤ꧀​ꦪꦼꦏ꧀ꦠꦶ꧈​​ꦥꦸꦂꦮꦺꦁ​ꦲꦸꦫꦶꦥ꧀​ꦱꦏꦶꦁ​ꦏꦺꦴꦤꦺꦴ​ꦱꦁꦏꦤꦶꦫ꧉​​
​ꦩꦂꦩ​ꦧꦺꦱꦸꦏ꧀​ꦪꦺꦤ꧀​ꦮꦸꦱ꧀​ꦲꦂꦱ​ꦥꦿꦥ꧀ꦠꦺꦁ​ꦭꦪꦸ꧈​​ꦲꦶꦁ​ꦥꦔꦺꦱ꧀ꦛꦶꦤꦶꦫ꧈​​ꦢꦸꦩꦸꦤꦸꦁꦤ​ꦲꦤꦺꦁ​ꦱꦸꦭ꧀ꦧꦶ꧈​​ꦪꦼꦏ꧀ꦠꦶ​ꦩꦸꦭꦾ​ꦮꦭꦸꦪ​ꦩꦿꦶꦁ​ꦲꦸꦫꦶꦥꦶꦫ꧉​​
​ꦠꦸꦂ​ꦲꦩꦼꦁꦏꦸ​ꦱꦭ꧀ꦮꦶꦫꦶꦁ​ꦫꦱ​ꦱꦢꦫꦸꦩ꧀꧈​​ꦩꦸꦁ​ꦤꦶꦏ꧀ꦩꦠ꧀​
​ꦩꦸꦥ꦳ꦔꦠ꧀꧈​​ꦱꦭꦩꦼꦠ꧀​ꦱꦭꦩꦶ​ꦭꦩꦶ꧈​​ꦭꦁꦒꦼꦁ​ꦲꦸꦫꦶꦥ꧀​ꦩꦁꦏ​ꦮꦶꦠꦶꦁ​ꦫꦱ​ꦩꦸꦭꦾ꧉​​
​ꦮꦼꦤꦺꦃ​ꦱꦸꦁ​ꦮꦿꦸꦃ​ꦗꦠꦶꦤꦶꦁ​ꦒꦸꦱ꧀ꦠꦶ​ꦮꦸꦱ꧀​ꦏꦫꦸꦃ꧈​​ꦧꦺꦚ꧀ꦗꦁ​ꦭꦩꦸꦤ꧀​ꦱꦶꦫ꧈​​ꦮꦸꦱ꧀​ꦥꦉꦏ꧀​ꦲꦤ꧀ꦠꦫꦺꦁ​ꦥꦠꦶ꧈​​ꦲꦤ​ꦫꦸꦥ​ꦏꦢꦾ​ꦫꦸꦥꦤ꧀ꦠ​ꦥꦿꦶꦪꦁꦒ꧉​​
​ꦏꦁ​ꦲꦏꦺꦴꦤꦸꦱ꧀​ꦱꦏꦶꦁ​ꦏꦩꦤꦸꦁꦱꦤ꧀ꦠ​ꦮꦸꦱ꧀꧈​​ꦱꦥ꧀ꦭꦏ꧀​ꦤꦺꦴꦫ​ꦱꦶꦮꦃ꧈​​ꦲꦩꦸꦁ​ꦩꦮ​ꦕꦃꦪ​ꦥꦸꦠꦶꦃ꧈​​ꦲꦶꦪ​ꦲꦶꦏꦸ​ꦏꦁ​ꦲꦫꦤ꧀​ꦩꦪꦁꦒ​ꦱꦺꦠ꧉​​
​ꦭꦩꦸꦤ꧀​ꦲꦶꦏꦸ​ꦮꦸꦱ꧀​ꦏꦢꦸꦭꦸ​ꦲꦶꦁ​ꦱꦶꦫꦺꦏꦸ꧈​​ꦕꦶꦥ꧀ꦠꦴ​ꦲꦤꦸꦁꦒꦭ꧀꧈​​ꦱꦼꦗꦏ꧀ꦤ​ꦒꦼꦤ꧀ꦠꦶ​ꦲꦸꦩꦚ꧀ꦗꦶꦁ꧈​​ꦢꦢꦶ​ꦠꦼꦠꦼꦥ꧀​ꦮꦫꦁꦏ​ꦩꦚ꧀ꦗꦶꦁ​ꦕꦸꦫꦶꦒ꧉​​
​ꦫꦩ꧀ꦥꦸꦁ​ꦥꦸꦠꦸꦱ꧀​ꦮꦸꦱ꧀​ꦠꦤ꧀​ꦲꦤ​ꦏꦁ​ꦮꦶꦤꦸꦮꦸꦱ꧀꧈​​ꦠꦼꦠꦼꦥ꧀​ꦲꦶꦁ​ꦥꦤꦸꦁꦒꦭ꧀꧈​​ꦥꦤꦸꦁꦒꦭꦶꦁ​ꦏ꧀ꦮꦸꦭ​ꦒꦸꦱ꧀ꦠꦶ꧈​​ꦩꦸꦭꦶꦃ​ꦩꦸꦭꦾ​ꦠꦤ꧀​ꦲꦤ​ꦒꦸꦱ꧀ꦠꦶ​ꦏꦮꦸꦭ꧉​​
​ꦮꦼꦤꦺꦃ​ꦮꦶꦏꦸ​ꦔꦏꦸ​ꦮꦶꦏꦤ꧀​ꦏꦁ​ꦲꦩꦼꦁꦏꦸ꧈​​ꦮꦸꦱ꧀​ꦠꦤ꧀ꦥ​ꦮꦼꦮꦺꦏ꧈​​ꦧꦺꦚ꧀ꦗꦁ​ꦩꦺꦃ​ꦥꦿꦤ꧀ꦠꦤꦶꦁ​ꦥꦠꦶ꧈​​ꦲꦤ​ꦕꦃꦪ​ꦱꦺꦠ​ꦥꦿꦥ꧀ꦠ​ꦒꦼꦁ​ꦱꦱꦢ꧉​​
​ꦲꦶꦪ​ꦲꦶꦏꦸ​ꦤꦸꦂ​ꦩꦸꦑꦩꦠ꧀​ꦏꦁ​ꦱꦠꦸꦲꦸ꧈​​ꦲꦸꦫꦶꦥꦶꦁ​ꦩꦤꦸꦱ꧈​​ꦮꦮꦱꦼꦤ꧀​ꦲꦪ꧀ꦮ​ꦒꦸꦩꦶꦱꦶꦂ꧈​​ꦠꦸꦠ꧀​ꦮꦸꦫꦶꦤꦼꦤ꧀​ꦠꦤ꧀​ꦲꦤ꧀ꦠꦫ​ꦪꦼꦏ꧀ꦠꦶ​ꦩꦸꦏ꧀ꦱ꧉​​
​ꦤꦩꦸ​ꦤꦩꦸ​ꦩꦿꦶꦁ​ꦮꦶꦪꦠ꧀​ꦤꦸꦏ꧀ꦱ꧀ꦩ​ꦢꦸꦩꦸꦤꦸꦁ꧈​​ꦲꦤꦤꦶꦁ​ꦠꦿꦁꦒꦤ꧈​​ꦪꦺꦏꦸ​ꦕꦃꦪ​ꦏꦁ​ꦤꦼꦭꦲꦶ꧈​​ꦲꦶꦁ​
ꦧꦸꦮꦤ​ꦮꦸꦱ꧀​ꦭꦁꦒꦼꦁ​ꦏꦴꦤꦤꦶꦫ꧉​​
​ꦩꦭꦶꦃ​ꦲꦱꦸꦁ​ꦠꦸꦢꦸꦃ​ꦲꦤꦤꦶꦁ​ꦲꦾꦁ​ꦄꦒꦸꦁ꧈​​ꦕꦃꦪ​ꦩꦪ​ꦩꦪ꧈​​ꦗꦸꦩꦼꦤꦼꦁ​ꦩꦸꦁꦒꦶꦁ​ꦲꦺꦴꦒꦿꦤꦶꦁ꧈​​ꦠꦸꦤ꧀ꦠꦸꦁ​ꦢꦿꦶꦪ​ꦲꦤꦂꦠꦤꦶ​ꦠꦿꦶꦭꦺꦴꦏꦪ꧉​​
​ꦧꦺꦠꦭ꧀​ꦩꦏ꧀ꦩꦸꦂ​ꦧꦺꦠꦭ꧀​ꦩꦸꦑꦫꦩ꧀​ꦏꦠꦼꦭꦸ꧈​​ꦲꦶꦁ​ꦧꦺꦠꦭ꧀​ꦩꦸꦏꦢꦱ꧀꧈​​ꦱꦸꦩꦸꦤꦂ​ꦥꦿꦥ꧀ꦠꦺꦁ​ꦥꦔꦺꦏ꧀ꦱꦶ꧈​​ꦭꦶꦪꦼꦥꦼꦤ​ꦏꦠꦺꦴꦤ꧀​ꦥꦺꦴꦤꦁ​ꦕꦃꦪ​ꦩꦪ꧉​​
​ꦲꦤꦫꦮꦸꦁ​ꦮꦂꦤ​ꦮꦂꦤ​ꦮꦺꦴꦂ​ꦢꦸꦩꦸꦤꦸꦁ꧈​​ꦭꦶꦪꦼꦥꦶꦁ​ꦥꦤꦶꦔꦭ꧀꧈​​ꦧꦺꦚ꧀ꦗꦁ​ꦪꦺꦤ꧀​ꦲꦂꦱ​ꦔꦼꦩꦱꦶ꧈​​ꦕꦃꦪ​ꦲꦶꦁꦏꦁ​ꦏꦏ꧀ꦱꦶ​ꦱꦶꦉꦥ꧀​ꦱꦢꦪ꧉​​
​ꦮꦶꦠ꧀​ꦒꦶꦤꦸꦭꦸꦁ​ꦲꦶꦁ​ꦕꦃꦪ​ꦏꦁ​ꦤꦺꦁ​ꦗꦿꦺꦴ​ꦗꦤ꧀ꦠꦸꦁ꧈​​ꦮꦭꦸꦪ​ꦔꦪꦔꦤ꧀꧈​​ꦤꦸꦏ꧀ꦱ꧀ꦩꦺꦁ​ꦕꦃꦪ​ꦏꦁ​ꦱꦗꦠꦶ꧈​​ꦏꦁ​ꦲꦥꦝꦁ​ꦒꦸꦩꦶꦭꦁ​ꦠꦤ꧀ꦥ​ꦮꦪꦔꦤ꧀꧉​​
​ꦭꦁꦒꦼꦁ​ꦔꦸꦮꦸꦁ​ꦲꦔꦺꦧꦼꦏꦶ​ꦧꦸꦮꦤꦒꦸꦁ꧈​​ꦩꦸꦭꦶꦃ​ꦥꦸꦂꦮꦤꦶꦫ꧈​​ꦢꦸꦏ꧀​ꦢꦸꦫꦸꦁ​ꦠꦸꦩꦸꦫꦸꦤ꧀​ꦩꦫꦶꦁ꧈​​ꦔꦂꦕꦥꦢ​ꦲꦮꦂꦤ​ꦮꦫꦤ​ꦫꦒ꧉​​
​ꦩꦭꦶꦃ​ꦒꦸꦫꦸ​ꦲꦩꦼꦗꦁ​ꦗꦠꦶꦤꦶꦁ​ꦔꦺꦭ꧀ꦩꦸ꧈​​ꦲꦶꦁ​ꦏꦩꦸꦭꦤꦶꦫ꧈​​ꦲꦤꦤꦶꦁ​ꦲꦾꦁ​ꦩꦲ​ꦮꦶꦢꦶ꧈​​ꦲꦩꦸꦁ​ꦱꦧ꧀ꦢ​ꦒꦲꦶꦧ꧀​ꦮꦺꦴꦂ​ꦲꦶꦁ​ꦫꦠ꧀​ꦮꦫꦠ꧉​​
​ꦕꦃꦪꦤꦶꦥꦸꦤ꧀​ꦒꦸꦩꦶꦭꦁ​ꦒꦶꦭꦁ​ꦤꦫꦮꦸꦁ꧈​​ꦠꦤ꧀ꦥ​ꦮꦼꦮꦪꦔꦤ꧀꧈​​ꦤꦼꦭꦲꦶ​ꦱꦺꦱꦶꦤꦶꦁ​ꦧꦸꦩꦶ꧈​​ꦒꦾ​ꦠꦸꦩꦸꦫꦸꦤ꧀​ꦮꦺꦴꦂ​ꦫꦃꦱ​ꦢꦢꦾ​ꦩꦤꦸꦁꦱ꧉​​  
꧇꧓꧕꧇​꧉​​ꦩꦂꦩ​ꦠꦼꦩ꧀ꦠꦸ​ꦪꦺꦤ꧀​ꦥꦿꦥ꧀ꦠ​ꦲꦤ꧀ꦠꦫꦺꦁ​ꦭꦪꦸ꧈​​ꦲꦤ​ꦕꦃꦪ​ꦥꦿꦥ꧀ꦠ꧈​​ꦒꦸꦩꦶꦭꦁ​ꦥꦶꦤ꧀ꦝ​ꦲꦁꦒꦤꦶꦁ꧈​​ꦠꦶꦂꦠ​ꦩꦸꦁꦒꦶꦁ​ꦫꦺꦴꦤ꧀​ꦭꦸꦩ꧀ꦧꦸ​ꦲꦩꦪ​ꦩꦪ꧉​​
​ꦢꦾꦤ꧀​ꦥꦸꦤꦶꦏꦸ​ꦕꦶꦥ꧀ꦠꦤꦼꦤ꧀​ꦢꦢꦾ​ꦱꦮꦸꦗꦸꦢ꧀꧈​​ꦭꦮꦤ꧀​ꦱꦧ꧀ꦢꦤꦶꦫ꧈​​ꦏꦁ​ꦱꦼꦤꦼꦢꦤ꧀​ꦱꦩꦢꦾꦤꦶꦁ꧈​​ꦔꦼꦤ꧀​ꦲꦔꦼꦤ꧀​ꦠ​ꦪꦼꦏ꧀ꦠꦶ​ꦮꦭꦸꦪ​ꦱꦩ꧀ꦥꦸꦂꦤ꧉​​
​ꦩꦸꦭꦾ​ꦮꦁꦱꦸꦭ꧀​ꦩꦿꦶꦁ​ꦲꦱꦭꦶꦫ​ꦫꦸꦩꦸꦲꦸꦤ꧀꧈​​ꦱꦧ꧀ꦢ​ꦒꦲꦶꦧ꧀​ꦧꦧꦂ꧈​​ꦧꦭꦶ​ꦲꦔꦺꦧꦼꦏꦶ​ꦧꦸꦩꦶ꧈​​ꦠꦿꦶꦧꦸꦮꦤ​ꦏꦼꦧꦏ꧀​ꦧꦁꦏꦶꦠ꧀​ꦩꦼꦒꦠ꧀​ꦚꦮ꧉​​  
꧅ꦟ꧀ꦢꦿ꧅
ꦮꦶꦫꦪꦠꦺ​ꦥꦫ​ꦮꦶꦏꦸ​ꦏꦁ​ꦢꦸꦫꦸꦁ​ꦮꦿꦸꦃ꧈​​ꦗꦠꦶꦤꦶꦁ​ꦏꦴꦤꦤ꧀​ꦗꦠꦶ꧈​​ꦏꦪ​ꦏꦁ​ꦏꦮꦃꦪꦺ​ꦔꦪꦸꦤ꧀꧈​​ꦏꦧꦺꦃ​ꦢꦠꦤ꧀​ꦲꦤ​ꦱꦶꦱꦶꦥ꧀꧈​​ꦧꦼꦤꦼꦂ​ꦮꦸꦱ꧀​ꦤꦺꦁ​ꦫꦒ​ꦩꦁꦒꦺꦴꦤ꧀꧉​​
ꦱꦧꦧ꧀​ꦲꦶꦏꦸ​ꦏꦧꦺꦃ​ꦮꦫꦤꦺꦁ​ꦲꦾꦁ​ꦄꦒꦸꦁ꧈​​ꦔꦸꦤꦶ​ꦢꦸꦒ꧀​ꦢꦸꦫꦸꦁ​ꦢꦸꦩꦢꦶ꧈​​ꦪ​ꦏꦼꦏꦼꦠ꧀​ꦫꦏꦼꦠ꧀​ꦠꦤ꧀​ꦏꦸꦩ꧀ꦥꦸꦭ꧀꧈​​ꦥꦭꦶꦏꦼꦠ꧀​ꦤꦺꦁ​ꦤꦸꦏꦠ꧀​ꦓꦲꦶꦥ꧀꧈​​ꦪꦪꦃ​ꦲꦠꦸꦁꦒꦶꦭ꧀​ꦱꦮꦶꦪꦺꦴꦱ꧀꧉​​
ꦏꦢꦾꦁꦒꦤꦶꦁ​ꦏꦁ​ꦱ꧀ꦮꦱꦤ​ꦮꦺꦴꦂ​ꦭꦤ꧀​ꦱꦸꦮꦸꦁ꧈​​ꦤꦸꦁꦒꦭ꧀​ꦫꦱ​ꦱꦺꦗꦺ​ꦮꦽꦤꦶ꧈​​ꦗꦠꦶꦤꦺ​ꦪ꧀ꦮ​ꦱ꧀ꦮꦱꦤꦺꦏꦸ꧈​​ꦏꦁ​ꦩꦤꦸꦏ꧀ꦱ꧀ꦩ​ꦗꦿꦺꦴꦤꦶꦁ​ꦝꦶꦫꦶ꧈​​ꦏꦠꦫꦶꦏ꧀​ꦢꦸꦏ꧀​ꦩꦸꦂꦮꦺꦁ​ꦫꦲꦺꦴꦱ꧀꧉​​
ꦫꦃꦱꦤꦶꦫ​ꦪꦪꦃ​ꦫꦺꦤ​ꦮꦺꦴꦂ​ꦱꦭꦸꦭꦸꦠ꧀꧈​​ꦏꦶꦤꦼꦩꦠ꧀​ꦱꦶꦁ​ꦤꦶꦏ꧀ꦩꦠ꧀ꦤꦺꦏꦶ꧈​​
ꦏꦩꦺꦴꦠ꧀​ꦏꦁ​ꦱ꧀ꦮꦱꦤ​ꦏꦠꦸꦠ꧀꧈​​ꦏꦴꦤꦤꦺ​ꦏꦁ​ꦱꦗꦠꦶ꧈​​ꦤꦺꦁ​ꦩꦤꦶ​ꦮꦺꦴꦫꦶꦁ​ꦱꦮꦶꦪꦺꦴꦱ꧀꧉​​
ꦲꦶꦪ​ꦲꦶꦏꦸ​ꦥꦸꦂꦮꦤꦶꦁ​ꦲꦾꦁ​ꦩꦲ​ꦄꦒꦸꦁ꧈​​ꦲꦩꦂꦤꦺꦁ​ꦠꦶꦠꦃ​ꦱꦏꦭꦶꦂ꧈​​ꦱꦏꦶꦁ​ꦏꦭꦫꦠꦺ​ꦏꦺꦴꦫꦸꦠ꧀꧈​​ꦏꦼꦏꦼꦠ꧀​ꦤꦺꦁ​ꦩꦤꦶꦁꦏꦼꦩ꧀​ꦤꦸꦭꦶ꧈​​ꦏꦸꦩꦸꦭꦶꦠ꧀​ꦔꦼꦩꦸꦭꦶ​ꦏꦺꦴꦛꦺꦴꦁ꧉​​
ꦠꦤ꧀​ꦲꦤ꧀ꦠꦫ​ꦏꦁ​ꦱꦸꦮꦸꦁ​ꦤꦸꦭꦾ​ꦏꦸꦩꦼꦢꦸꦢ꧀꧈​​ꦏꦠꦸꦠ꧀​ꦏꦁ​ꦱ꧀ꦮꦱꦤ​ꦏꦺꦴꦱꦶꦏ꧀꧈​​ꦏꦱꦽꦒ꧀​ꦥꦤꦱ꧀​ꦭꦤ꧀​ꦱꦽꦥꦶꦥꦸꦤ꧀꧈​​ꦏꦸꦩꦫꦶꦔꦼꦠ꧀​ꦠꦿꦶ​ꦱꦸꦠꦺꦁꦱꦶ꧈​​ꦮꦸꦱ꧀​ꦏꦱꦠ꧀​ꦩꦠ​ꦱꦪꦼꦏ꧀ꦠꦺꦴꦱ꧀꧉​​
ꦏꦂꦱꦤꦶꦁ​ꦲꦾꦁ​ꦏꦚꦠꦴꦤ꧀​ꦢꦢꦶ​ꦮꦸꦗꦸꦢ꧀꧈​​ꦮꦸꦗꦸꦢꦶꦁ​ꦏꦁ​ꦗꦧꦁ​ꦧꦪꦶ꧈​​ꦮꦤꦺꦴꦢꦾ​ꦠꦤꦥꦶ​ꦗꦭꦸ꧈​​ꦭꦮꦤ꧀​ꦏꦁ​ꦱ꧀ꦮꦱꦤ​ꦩꦏ꧀ꦱꦶꦃ꧈​​ꦲꦤꦺꦁ​ꦗꦿꦺꦴ​ꦢꦢꦶ​ꦥꦶꦫꦤ꧀ꦠꦺꦴꦱ꧀꧉​​
ꦥꦶꦫꦤ꧀ꦠꦶꦤꦶꦁ​ꦩꦤꦸꦁꦱ​ꦏꦁ​ꦲꦭꦸꦱ꧀​ꦲꦭꦸꦱ꧀꧈​​ꦊꦱ꧀ꦠꦫꦶ​ꦩꦤꦸꦏ꧀ꦱ꧀ꦩꦺꦁ​ꦝꦶꦫꦶ꧈​​ꦲꦤꦔꦶꦁ​ꦥꦏꦂꦠꦶꦤꦶꦥꦸꦤ꧀꧈​​ꦱ꧀ꦮꦱꦤ​ꦩꦤꦸꦠ꧀​ꦥꦶꦫꦤ꧀ꦠꦶ꧈​​ꦏꦁ​ꦲꦮꦝꦒ꧀​ꦲꦸꦫꦠꦶꦁ​ꦮꦺꦴꦁ꧉​​
ꦏꦂꦱꦤꦶꦁ​ꦲꦾꦁ​ꦥꦶꦤꦺꦫꦁ​ꦢꦢꦶ​ꦠꦿꦶ​ꦗꦸꦫꦸ꧈​​ꦏꦺꦴꦕꦥ꧀​ꦲꦶꦁ​ꦲꦶꦢꦪꦠ꧀​ꦗꦠꦶ꧈​​ꦏꦥꦭ​ꦫꦤ꧀​ꦧꦺꦠꦭ꧀​ꦩꦏ꧀ꦩꦸꦂ꧈​​ꦱ꧀ꦮꦱꦤ​ꦏꦸꦩꦿꦶꦔꦼꦠ꧀​ꦢꦢꦶ꧈​​ꦠꦶꦂꦠ​ꦩꦪ​ꦤꦺꦁ​ꦗꦿꦺꦴ​ꦥꦤꦺꦴꦤ꧀꧉​​
​ꦲꦶꦪ​ꦲꦫꦤ꧀​ꦠꦶꦂꦠꦩꦂꦠ​ꦏꦩꦤ꧀ꦝꦤꦸ꧈​​ꦥꦂꦢꦶꦏꦤꦺ​ꦧꦚꦸ​ꦲꦸꦫꦶꦥ꧀꧈​​ꦭꦺꦴꦫꦺꦴ​
ꦗꦿꦺꦴꦤꦶꦁ​ꦗꦗ​ꦏꦱ꧀ꦧꦸꦠ꧀꧈​​ꦲꦶꦁ​ꦧꦺꦠꦭ꧀​ꦩꦸꦑꦫꦩ꧀​ꦲꦶꦱꦶ꧈​​ꦗꦼꦗꦤ꧀ꦠꦸꦁ​ꦲꦶꦁ​ꦗꦼꦫꦺꦴ​ꦏꦺꦴꦛꦺꦴꦁ꧉​​
​ꦩꦸꦁ​ꦱ꧀ꦮꦱꦤ​ꦤꦺꦁ​ꦔꦿꦶꦏꦸ​ꦩꦤꦸꦏ꧀ꦱ꧀ꦩꦺꦁ​ꦱꦸꦮꦸꦁ꧈​​ꦠꦼꦭꦸ​ꦏꦺꦴꦤ꧀ꦛꦺꦴꦭ꧀​ꦢꦺꦤ꧀​ꦮꦱ꧀ꦠꦤꦶ꧈​​ꦧꦺꦠꦭ꧀​ꦩꦸꦑꦢꦱ꧀​ꦥꦸꦤꦶꦏꦸ꧈​​ꦩꦺꦱꦶ​ꦩꦤꦶ​ꦩꦢꦶ​ꦮꦢꦶ꧈​​ꦪ​ꦲꦶꦱꦶꦱ꧀​ꦮꦱꦤ​ꦏꦺꦴꦛꦺꦴꦁ꧉​​
​ꦲꦩꦁꦱꦸꦭꦶ​ꦥꦏꦂꦠꦶꦤꦶꦁ​ꦏꦩꦤ꧀ꦝꦤꦸ꧈​​ꦠꦤ꧀ꦱꦃ​ꦲꦩꦶꦢꦿꦮꦺꦁ​ꦝꦶꦫꦶ꧈​​ꦤꦸꦫꦸꦠ꧀​ꦲꦶꦁ​ꦢꦫꦃ​ꦭꦤ꧀​ꦧꦪꦸ꧈​​ꦏꦁ​ꦢꦫꦃ​ꦏꦸꦩꦼꦗꦺꦴꦠ꧀​ꦏꦺꦴꦱꦶꦏ꧀꧈​​ꦲꦔꦼꦧꦸꦠ꧀​ꦱ꧀ꦮꦱꦤ​ꦢꦢꦺꦴꦱ꧀꧉​​
​ꦤꦥꦱꦶꦁ​ꦮꦺꦴꦁ​ꦩ꧀ꦭꦼꦧꦸ​ꦩꦼꦠꦸ​ꦭꦶꦫ​ꦭꦶꦫꦸ꧈​​ꦭꦮꦤ꧀​ꦱ꧀ꦮꦱꦤ​ꦲꦶꦁ​ꦗꦮꦶ꧈​​ꦢꦢꦶ​ꦠꦼꦠꦭꦶꦤꦶꦁ​ꦲꦶꦝꦸꦥ꧀꧈​​ꦧꦁꦱ​​ꦲꦩꦱ꧀ꦠꦤꦶ꧈​​ꦱꦭꦠ꧀​ꦢꦲꦶꦩ꧀​ꦥꦸꦗꦶꦤꦶꦁ​ꦫꦺꦴꦃ꧉​​
​ꦲꦶꦪ​ꦲꦶꦏꦸ​ꦧꦼꦧꦱꦤꦺ​ꦥꦿ​ꦭꦶꦤꦁꦏꦸꦁ꧈​​ꦱꦸꦮꦸꦁ​ꦩꦼꦁꦏꦸ​ꦲꦤꦤꦺꦏꦶ꧈​​ꦲꦶꦪ​ꦲꦤꦥꦱ꧀​ꦏꦁ​ꦮꦶꦤꦼꦁꦏꦸ꧈​​ꦪꦺꦤ꧀​ꦱꦸꦮꦸꦔꦺ​ꦗꦒꦢ꧀​ꦲꦶꦏꦶ꧈​​ꦩꦼꦁꦏꦸ​ꦱ꧀ꦮꦱꦤ​ꦲꦶꦁ​ꦏꦺꦴꦤꦺꦴ꧉​​
​ꦏꦫꦺꦴꦚ꧀ꦕꦺꦤꦼꦤ꧀​ꦏꦭꦩꦸꦤ꧀​ꦏꦧꦺꦃ​ꦠꦶꦤꦸꦠꦸꦂ꧈​​ꦭꦶꦂ​ꦭꦪꦁ​ꦲꦶꦢꦪꦠ꧀​ꦗꦠꦶ꧈​​ꦫꦶꦁꦏꦼꦱꦺ​ꦱ꧀ꦮꦱꦤ​ꦩꦲꦸ꧈​​ꦏꦁ​ꦤꦺꦁ​ꦗꦿꦺꦴꦤꦶꦁ​ꦫꦒ​ꦢꦢꦶ꧈​​ꦥꦶꦫꦤ꧀ꦠꦶ​ꦏꦁ​ꦲꦭꦸꦱ꧀​ꦪꦼꦏ꧀ꦠꦺꦴꦱ꧀꧉​​
​ꦏꦁ​ꦤꦺꦁ​ꦫꦸꦲꦸꦂ​ꦢꦢꦶ​ꦕꦃꦪ​ꦥꦿꦩꦤꦺꦏꦸ꧈​​ꦩꦼꦁꦏꦸ​ꦥꦚ꧀ꦕꦢꦿꦶꦪ​ꦤꦸꦭꦶ꧈​​ꦥꦼꦚ꧀ꦕꦂ​ꦧꦶꦱ​ꦔꦩ꧀ꦧꦸ​ꦔꦿꦸꦔꦸ꧈​​ꦧꦶꦱ​ꦚꦫ​ꦭꦤ꧀​ꦩꦔꦺꦏ꧀ꦱꦶ꧈​​
ꦏꦁ​ꦲꦤꦺꦁ​ꦠꦼꦔꦃ​ꦏꦮꦲꦺꦴꦱ꧀꧉​​
​ꦲꦶꦪ​ꦢꦢꦶ​ꦥꦚ꧀ꦕ​ꦩꦪ​ꦏꦁ​ꦲꦩꦼꦁꦏꦸ꧈​​ꦫꦱ​ꦥꦔꦿꦱ​ꦕꦶꦥ꧀ꦠ​ꦱꦶꦂ꧈​​ꦧꦁꦏꦶꦠ꧀​ꦔꦁꦒꦶꦠ꧀​ꦔꦶꦫ​ꦤꦸꦗꦸ꧈​​ꦚꦤ​ꦚꦏꦿꦧꦮ​ꦠꦸꦮꦶꦤ꧀꧈​​ꦱ꧀ꦮꦱꦤ​ꦏꦁ​ꦲꦤꦺꦁ​ꦔꦶꦱꦺꦴꦂ꧉​​
​ꦏ꧀ꦮꦱ​ꦩꦼꦁꦏꦸ​ꦥꦚ꧀ꦕ​ꦲꦱ꧀ꦩꦫ​ꦪꦲꦶꦏꦸ꧈​​ꦮꦶꦠꦶꦁ​ꦏꦱꦼꦁꦱꦼꦩ꧀​ꦱꦉꦱ꧀ꦩꦶ꧈​​ꦱꦏꦶꦁ​ꦥꦚ꧀ꦕꦢꦿꦶꦪ​ꦠꦸꦩꦿꦸꦤ꧀꧈​​ꦤꦸꦏ꧀ꦱ꧀ꦩꦺꦁ​ꦥꦚ꧀ꦕ​ꦩꦪ​ꦠꦿꦸꦱ꧀​ꦩꦿꦶꦁ꧈​​ꦥꦚ꧀ꦕꦱ꧀ꦩꦫ​ꦩꦼꦁꦏꦸ​ꦫꦲꦺꦴꦱ꧀꧉​​
​ꦫꦤ꧀​ꦲꦱ꧀ꦩꦫ​ꦠꦸꦫꦶꦢ​ꦥꦶꦁ​ꦏꦭꦶꦲꦶꦥꦸꦤ꧀꧈​​ꦲꦱ꧀ꦩꦫꦏꦥꦶꦁ​ꦠꦿꦶ꧈​​ꦏꦥꦠ꧀​ꦲꦱ꧀ꦩꦫ​ꦕꦶꦥ꧀ꦠꦺꦏꦸ꧈​​ꦢꦢꦶꦤꦺ​ꦮꦺꦴꦫꦶꦁ​ꦱꦉꦱ꧀ꦩꦶ꧈​​ꦲꦱ꧀ꦩꦫꦒꦩ​ꦏꦕꦿꦶꦪꦺꦴꦱ꧀꧉​​
​ꦏꦧꦺꦃ​ꦩꦁꦏ​ꦏꦭꦫꦠꦶꦫ​ꦃꦪꦁ​ꦄꦒꦸꦁ꧈​​ꦢꦺ​ꦱ꧀ꦮꦱꦤ​ꦏꦁ​ꦤꦺꦁ​ꦗꦮꦶ꧈​​ꦢꦢꦶ​ꦏꦴꦤꦤ꧀​ꦱꦮꦼꦒꦸꦁ꧈​​ꦠꦺꦗ​ꦏꦸꦮꦸꦁ​ꦏꦶꦭꦠ꧀​ꦛꦛꦶꦠ꧀꧈​​ꦕꦭꦺꦫꦺꦠ꧀​ꦗꦭꦢꦫ​ꦮꦺꦴꦂ꧉​​
​ꦩꦺꦒ​ꦩꦼꦤ꧀ꦝꦸꦁ​ꦲꦩ꧀ꦥꦏ꧀​ꦲꦩ꧀ꦥꦏ꧀​ꦒꦸꦤ꧀ꦠꦸꦂ​ꦏꦼꦠꦸꦏ꧀꧈​​ꦧꦪꦸ​ꦧꦗꦿ​ꦲꦔꦶꦤ꧀​ꦲꦔꦶꦤ꧀꧈​​ꦲꦩꦸꦤ꧀​ꦲꦩꦸꦤ꧀​ꦢꦫꦸ​ꦥꦸꦭꦸꦁ꧈​​ꦏꦧꦺꦃ​ꦱꦲꦶꦱꦶꦤꦶꦁ​ꦭꦔꦶꦠ꧀꧈​​ꦱ꧀ꦮꦱꦤ​ꦏꦁ​ꦢꦤ꧀ꦢꦺꦴꦱ꧀​ꦢꦤ꧀ꦢꦺꦴꦱ꧀꧉​​
​ꦧꦸꦩꦶ​ꦧꦚꦸ​ꦮꦽꦏ꧀ꦱ​ꦒꦸꦭ꧀ꦩ​ꦭꦠ​ꦭꦸꦩꦸꦁ꧈​​ꦱꦫꦸꦥꦤꦶꦁ​ꦏꦁ​ꦏꦸꦩꦼꦭꦶꦥ꧀꧈​​ꦏꦁ​ꦒꦸꦩꦽꦧꦼꦒ꧀​ꦏꦁ​ꦏꦸꦩꦿꦸꦩ꧀ꦥꦾꦸꦁ꧈​​ꦠꦤ꧀​ꦭꦾꦤ꧀​ꦱ꧀ꦮꦱꦤ​ꦏꦁ​ꦢꦢꦶ꧈​​ꦠꦸꦲꦸ​
ꦱ꧀ꦮꦱꦤ​ꦏꦸꦮꦲꦺꦴꦱ꧀꧉​​
​ꦠꦼꦠꦼꦥ꧀​ꦢꦢꦾ​ꦮꦼꦮꦏꦶꦭꦶꦁ​ꦏꦁ​ꦩꦲꦒꦸꦁ꧈​​ꦏꦮꦱ​ꦩꦸꦂꦮꦺꦁ​ꦱꦏꦭꦶꦂ꧈​​ꦩꦂꦩ​ꦥꦿ​ꦒꦸꦫꦸ​ꦏꦁ​ꦠꦤ꧀​ꦮꦿꦸꦃ꧈​​ꦲꦤꦤꦶꦁ​ꦏꦴꦤꦤ꧀​ꦗꦠꦶ꧈​​ꦱ꧀ꦮꦱꦤ​ꦏꦁ​ꦱꦭꦶꦤ꧀​ꦲꦼꦁꦒꦺꦴꦤ꧀꧉​​
​ꦤꦸꦭꦶ​ꦥꦝ​ꦢꦺꦤ꧀​ꦲꦁꦒꦼꦥ꧀​ꦏꦁ​ꦩꦲ​ꦄꦒꦸꦁ꧈​​ꦥꦶꦤꦔꦿꦤ꧀​ꦥꦶꦤꦸꦤ꧀ꦝꦶ​ꦥꦸꦤ꧀ꦝꦶ꧈​​ꦏꦪ​ꦏꦁ​ꦏꦮꦃꦪꦺꦁ​ꦥꦸꦕꦸꦁ꧈​​ꦠꦤ꧀​ꦮꦿꦸꦃ​ꦪꦺꦤ꧀​ꦲꦶꦏꦸ​ꦠꦿꦶꦩꦸꦂꦠꦶ꧈​​ꦱꦭꦶꦤ꧀​ꦒꦺꦴꦤ꧀​ꦱꦭꦶꦤ꧀​ꦊꦭꦒꦺꦴꦤ꧀꧉​​
​ꦱꦭꦶꦤ꧀​ꦲꦱ꧀ꦩ​ꦭꦤ꧀​ꦱꦭꦶꦤ꧀​ꦥꦔ꧀ꦮꦱꦤꦶꦥꦸꦤ꧀꧈​​ꦭꦩꦸꦤ꧀​ꦩꦤꦸꦏ꧀ꦱ꧀ꦩꦺꦁ​ꦩꦿꦶꦁ​ꦕꦕꦶꦁ꧈​​ꦪꦼꦏ꧀ꦠꦶ​ꦩꦸꦁ​ꦩꦁꦏꦼꦉꦠ꧀​ꦩꦸꦭꦸꦂ꧈​​ꦪꦺꦤ꧀​ꦩꦤꦸꦏ꧀ꦱ꧀ꦩꦺꦁ​ꦮꦭꦁ​ꦧꦁꦏꦶꦠ꧀꧈​​ꦩꦶꦧꦼꦂ​ꦩꦊꦠꦶꦏ꧀​ꦩꦚ꧀ꦕꦺꦴꦭꦺꦴꦠ꧀꧉​​
​ꦪꦺꦤ꧀​ꦩꦚ꧀ꦗꦶꦁ​ꦮꦺꦴꦁ​ꦧꦶꦱ​ꦔꦁꦒꦶꦠ꧀​ꦧꦶꦱ​ꦔꦶꦢꦸꦁ꧈​​ꦠꦼꦂꦏꦝꦁ​ꦧꦶꦱ​ꦲꦸꦢꦤꦶ꧈​​ꦩꦫꦶꦁ​ꦱꦗꦠꦶꦤꦶꦁ​ꦲꦶꦝꦸꦥ꧀꧈​​ꦮꦿꦸꦃ​ꦱꦁꦏꦤ꧀​ꦥꦫꦤꦶꦁ​ꦲꦸꦫꦶꦥ꧀꧈​​ꦥꦔꦿꦏꦶꦠꦶꦁ​ꦫꦺꦃ​ꦠꦤ꧀​ꦏꦺꦫꦺꦴꦤ꧀꧉​​
​ꦩꦂꦩꦤꦶꦫ​ꦏꦧꦺꦃ​ꦥꦔꦁꦒꦼꦥꦶꦁ​ꦒꦸꦫꦸ꧈​​ꦏꦁ​ꦥꦝ​ꦩꦔꦺꦫꦤ꧀​ꦩꦫꦶꦁ꧈​​ꦫꦱ​ꦥꦔꦿꦱ​ꦕꦃꦪ​ꦤꦸꦁ꧈​​ꦩꦔꦿꦤ꧀​ꦩꦿꦶꦁ​ꦥꦿꦩꦤ​ꦠꦸꦮꦶꦤ꧀꧈​​ꦩꦔꦿꦤ꧀​ꦱ꧀ꦮꦫ​ꦕꦶꦥ꧀ꦠꦺꦁ​ꦧꦠꦺꦴꦱ꧀꧉​​
​ꦏꦪ​ꦲꦶꦁꦏꦁ​ꦏꦮꦃꦪ​ꦲꦶꦁ​ꦱꦼꦏꦂ​ꦥꦸꦕꦸꦁ꧈​​ꦱꦪꦼꦏ꧀ꦠꦶ​ꦧꦺꦚ꧀ꦗꦁ​ꦲꦸꦩꦚ꧀ꦗꦶꦁ꧈​​ꦩꦿꦶꦁ​ꦱ꧀ꦮꦱꦤ​ꦩꦺꦴꦫꦶꦁ​ꦱꦸꦮꦸꦁ꧈​​ꦲꦂꦱ​ꦔꦸꦁꦱꦶ​ꦩꦫꦶꦁ​ꦔꦼꦤ꧀ꦢꦶ꧈​​ꦔꦂꦱ​ꦮꦸꦫꦶ​ꦝꦸꦮꦸꦂ​ꦔꦶꦱꦺꦴꦂ꧉​​
꧅ꦟ꧀ꦢꦿ꧅
ꦗꦧ​ꦗꦼꦫꦺꦴ​ꦏꦧꦼꦏꦤ꧀꧈​​ꦲꦶꦁ​ꦱ꧀ꦮꦱꦤ​ꦱꦤꦢꦾꦤ꧀​ꦏꦁ​ꦠꦤ꧀​ꦔꦺꦭ꧀ꦩꦶ꧈​​ꦲꦶꦪ​ꦩꦤꦸꦏ꧀ꦱ꧀ꦩꦺꦁ​ꦩꦿꦶꦁ​ꦱꦸꦮꦸꦁ꧈​​ꦏꦮꦸꦂ​ꦲꦶꦁ​ꦠꦮꦁ​ꦠꦺꦴꦮꦁ꧈​​ꦤꦺꦴꦫ​ꦧꦺꦢ​ꦭꦮꦤ꧀​ꦲꦶꦁꦏꦁ​ꦲꦃꦭꦶ​ꦔꦺꦭ꧀ꦩꦸ꧈​​ꦏꦭꦩꦸꦤ꧀​ꦤꦺꦴꦫ​ꦮꦱ꧀ꦥꦢ꧈​​ꦢꦸꦤꦸꦔꦶꦁ​ꦏꦴꦤꦤ꧀​ꦗꦠꦶ꧉​​
ꦱꦗꦠꦶꦤꦶꦁ​ꦲꦸꦫꦶꦥꦶꦫ꧈​​ꦏꦁ​ꦮꦸꦱ꧀​ꦲꦮꦺꦴꦂ​ꦠꦤ꧀​ꦥꦶꦱꦃ​ꦱꦶꦪꦁ​ꦫꦠꦿꦶ꧈​​ꦱꦗꦿꦺꦴꦤꦶꦁ​ꦏꦸꦂꦄꦤ꧀​ꦏꦱꦼꦧꦸꦠ꧀꧈​​ꦩꦶꦤ꧀ꦏꦶꦧꦫꦶꦭ꧀​ꦮꦫꦶꦠ꧈​​ꦒꦸꦱ꧀ꦠꦶ​ꦄꦭ꧀ꦭꦃ​ꦫꦏꦼꦠꦤ꧀​ꦭꦤ꧀​ꦫꦱꦤꦶꦥꦸꦤ꧀꧈​​ꦭꦶꦫꦺ​ꦮꦸꦱ꧀​ꦲꦮꦺꦴꦂ​ꦱꦫꦱ꧈​​ꦫꦱ​ꦱꦗꦿꦺꦴꦤꦶꦁ​ꦔꦲꦸꦫꦶꦥ꧀꧉​​
ꦲꦸꦫꦶꦥ꧀​ꦲꦶꦁꦏꦁ​ꦩꦮ​ꦗꦶꦮ꧈​​ꦗꦶꦮꦤꦶꦫ​ꦩꦁꦏ​ꦮꦫꦤ​ꦗꦠꦶ꧈​​ꦗꦠꦶꦤꦶꦁ​ꦲꦸꦫꦶꦥ꧀​ꦥꦸꦤꦶꦏꦸ꧈​​ꦪꦼꦏ꧀ꦠꦶ​ꦠꦤ꧀​ꦔꦁꦒꦺꦴ​ꦚꦮ꧈​​ꦤꦺꦴꦫ​ꦚꦫ​ꦤꦺꦴꦫ​ꦒꦤ꧀ꦢ​ꦤꦺꦴꦫ​ꦢꦸꦭꦸ꧈​​ꦤꦺꦴꦫ​ꦩꦸꦤ​ꦠꦤ꧀​ꦔꦤ꧀ꦢꦶꦏ꧈​​ꦠꦤ꧀ꦥ​ꦫꦱ​ꦥꦔꦿꦱ​ꦤꦶꦂ꧉​​
ꦲꦩꦸꦁ​ꦤꦼꦁ​ꦲꦼꦤꦶꦁ​ꦢꦾꦠ꧀ꦩꦶꦏ꧈​​ꦤꦺꦁ​ꦏꦴꦤꦤ꧀​ꦲꦤꦤꦶꦫ​ꦥꦿꦶꦧꦢꦶ꧈​​ꦤꦔꦶꦁ​ꦏꦧꦺꦃ​ꦏꦁ​ꦏꦢꦸꦭꦸ꧈​​ꦲꦥꦤ꧀​ꦮꦸꦱ꧀​ꦏꦲꦸꦤꦶꦔꦤ꧀꧈​​ꦏꦁ​ꦏꦫꦸꦔꦸ​ꦮꦸꦱ꧀​ꦏꦥꦾꦂꦱ​ꦲꦶꦁ​ꦲꦾꦁ​ꦄꦒꦸꦁ꧈​​ꦏꦁ​ꦏꦴꦩ꧀ꦧꦸ​ꦮꦸꦱ꧀​ꦏꦒꦤ꧀ꦢ꧈​​ꦏꦁ​ꦚꦫ​ꦏꦱꦧ꧀ꦢ​ꦪꦼꦏ꧀ꦠꦶ꧉​​
ꦏꦁ​ꦲꦔꦿꦱ​ꦮꦸꦱ꧀​ꦏꦫꦃꦱꦤ꧀꧈​​ꦲꦶꦤꦭꦺꦴꦲ​ꦲꦸꦮꦱꦩꦶꦔ꧀ꦮꦭ꧀​ꦔꦭꦶꦩ꧀꧈​​ꦄꦭ꧀ꦭꦃ​ꦲꦶꦏꦸ​ꦗꦼꦩ꧀ꦧꦂ​ꦲꦒꦸꦁ꧈​​ꦲꦸꦤꦶꦔ​ꦱꦤꦶꦱ꧀ꦏꦫ꧈​​ꦤꦺꦴꦫ​ꦱꦩꦂ​ꦪ​ꦤꦸꦏꦠ꧀​
​ꦓꦲꦶꦥ꧀ꦧꦸꦭ꧀ꦒꦸꦪꦸꦥ꧀꧈​​ꦭꦶꦫꦶꦁ​ꦮꦶꦗꦶ​ꦥꦼꦥꦶꦔꦶꦠꦤ꧀꧈​​ꦱꦸꦩꦶꦔꦶꦠ꧀​ꦲꦶꦁ​ꦫꦃꦱꦤꦺꦏꦶ꧉​​
ꦤꦔꦶꦁ​ꦥꦶꦭꦶꦃ​ꦏꦁ​ꦲꦸꦤꦶꦔ꧈​​ꦭꦩꦸꦤ꧀​ꦲꦺꦴꦫ​ꦭꦮꦤ꧀​ꦥꦶꦠꦸꦢꦸꦃ​ꦗꦠꦶ꧈​​ꦭꦥ꦳ꦭꦺ​ꦭꦪꦸ​ꦑꦪꦥꦸ꧈​​ꦠꦤ꧀​ꦏꦼꦤ​ꦏꦪ​ꦔꦥ꧈​​ꦲꦤꦤꦶꦫ​ꦱꦩꦂ​ꦠꦤ꧀​ꦏꦼꦤ​ꦒꦶꦤꦪꦸꦃ꧈​​ꦪꦺꦤ꧀​ꦲꦺꦴꦫ​ꦭꦤ꧀​ꦮꦃꦪꦸꦤꦶꦁ​ꦲꦾꦁ꧈​​ꦤꦔꦶꦁ​ꦮꦗꦶꦧꦸꦭ꧀​ꦮꦸꦗꦸꦢꦶ꧉​​
ꦭꦶꦫꦺ​ꦮꦗꦶꦧ꧀​ꦮꦸꦗꦸꦢꦶꦫ꧈​​ꦲꦶꦪ​ꦲꦫꦤ꧀​ꦏꦪꦸꦤ꧀​ꦲꦶꦭ​ꦧꦶꦫꦏꦶꦤ꧀꧈​​ꦲꦸꦫꦶꦥ꧀​ꦠꦤ꧀ꦥ​ꦗꦶꦮꦤꦶꦥꦸꦤ꧀꧈​​ꦩꦸꦁ​ꦢꦪ​ꦥꦿꦧꦮꦚ꧈​​ꦲꦔꦸꦫꦶꦥꦶ​ꦱꦺꦱꦶꦤꦶꦁ​ꦧꦸꦮꦤ​ꦱꦒꦸꦁ꧈​​ꦤꦼꦔꦺ​ꦧꦶꦱ​ꦏꦂꦪ​ꦲꦺꦴꦧꦃ꧈​​ꦏꦪꦸꦤ꧀​ꦲꦶꦭ​ꦥꦶꦤ꧀ꦢꦫꦺꦤꦶ꧉​​
ꦧꦶꦱ​ꦲꦸꦫꦶꦥ꧀​ꦫꦺꦴꦁ​ꦥꦁꦒꦺꦴꦤꦤ꧀꧈​​ꦭꦶꦫꦺ​ꦲꦸꦫꦶꦥ꧀​ꦤꦺꦁ​ꦔꦭꦩ꧀​ꦏꦧꦶꦂ​ꦱꦲꦶꦂ꧈​​ꦏꦧꦺꦃ​ꦩꦸꦁ​ꦥꦿꦶꦧꦢꦶꦤꦶꦥꦸꦤ꧀꧈​​ꦲꦶꦁ​ꦏꦺꦤꦺ​ꦏꦤ​ꦲꦤ꧈​​ꦲꦶꦪ​ꦏꦤ​ꦏꦺꦤꦺ​ꦠꦤ꧀​ꦲꦤ​ꦚꦏꦸꦛꦸ꧈​​ꦩꦸꦁ​ꦱꦮꦶꦗꦶ​ꦤꦺꦴꦫ​ꦲꦺꦴꦮꦃ꧈​​ꦭꦁꦒꦼꦁ​ꦲꦶꦁ​ꦱꦭꦩꦶ​ꦭꦩꦶ꧉​​
ꦲꦤ​ꦱꦱ꧀ꦩꦶꦠꦤꦶꦫꦺꦁ​ꦲꦾꦁ꧈​​ꦩꦸꦚꦺꦁ​ꦏꦶꦠꦧ꧀​ꦢꦑꦲꦶꦏꦸꦭ꧀​ꦄꦑꦲꦶꦏ꧀꧈​​ꦝꦶꦔꦶꦤ꧀​ꦤꦶꦠꦲꦏꦼꦤ꧀​ꦏꦪꦸ꧈​​ꦱꦗꦫꦠꦸꦭ꧀​ꦪꦏꦶꦤ꧈​​ꦠꦸꦮꦸꦃ​ꦲꦤꦺꦁ​ꦗꦿꦺꦴꦤꦶꦁ​ꦲꦭꦩ꧀​ꦲꦢꦩ꧀​ꦩꦏ꧀ꦢꦸꦩ꧀꧈​​ꦲꦗꦭꦶ​ꦲꦧꦢꦶ​ꦲꦶꦏ꧈​​ꦠꦼꦒꦼꦱꦺ​ꦒꦼꦱꦁ​ꦱꦗꦠꦶ꧉​​
​ꦠꦸꦩꦸꦮꦸꦃ​ꦲꦤꦺꦁ​ꦧꦸꦮꦤ꧈​​ꦪ​ꦢꦸꦏ꧀​ꦩꦏ꧀ꦱꦶꦃ​
​ꦮꦁ​ꦔꦸꦮꦸꦁ​ꦱꦺꦴꦚꦫꦸꦫꦶ꧈​​ꦱꦸꦮꦸꦁ​ꦲꦶꦁ​ꦱꦭꦩꦶꦤꦶꦥꦸꦤ꧀꧈​​ꦲꦤꦺꦁ​ꦏꦴꦤꦤ꧀​ꦏꦶꦠ꧈​​ꦭꦃ​ꦥꦸꦤꦶꦏꦸ​ꦲꦸꦭꦠꦤ​ꦢꦺꦤ꧀​ꦏꦥꦁꦒꦸꦃ꧈​​ꦠꦏꦺꦴꦏ꧀ꦤ​ꦩꦿꦶꦁ​ꦥꦿ​ꦥꦤ꧀ꦝꦶꦠ꧈​​ꦏꦁ​ꦥꦸꦤ꧀ꦝꦸꦃ​ꦥꦶꦤ꧀ꦝꦤꦶꦁ​ꦥꦠꦶ꧉​​
​ꦥꦿꦤ꧀ꦢꦺꦤꦺ​ꦏꦁ​ꦮꦸꦱ꧀​ꦱꦩ꧀ꦥꦸꦂꦤ꧈​​ꦲꦶꦁ​ꦥꦔꦮꦿꦸꦃ​ꦠꦤ꧀​ꦱꦩꦂ​ꦮꦺꦴꦫꦶꦁ​ꦝꦶꦫꦶ꧈​​ꦏꦁ​ꦔꦭꦶꦔꦶ​ꦮꦸꦱ꧀​ꦏꦢꦸꦭꦸ꧈​​ꦩ꧀ꦭꦺꦭ​ꦠꦤ꧀​ꦏꦭꦩꦠꦤ꧀꧈​​ꦮꦿꦸꦲꦶꦁ​ꦥꦿꦤ​ꦥꦩ꧀ꦧꦸꦏꦤꦺ​ꦠꦤ꧀​ꦏꦭꦶꦫꦸ꧈​​ꦗꦿꦺꦴ​ꦭꦶꦪꦼꦥ꧀​ꦭꦪꦥ꧀​ꦏꦫꦱ꧈​​ꦱꦏꦶꦁ​ꦥꦿꦤ​ꦥꦿꦤꦮꦤꦶꦁ꧉​​
​ꦏꦁ​ꦩꦁꦏꦺꦴꦤꦺꦴ​ꦮꦶꦤꦱ꧀ꦠꦤꦤ꧀꧈​​ꦱꦩ꧀ꦥꦸꦤ꧀​ꦥꦤ​ꦤꦸꦁꦏꦸ​ꦥꦸꦢꦾ​ꦱꦼꦩꦺꦢꦶ꧈​​ꦩꦭꦢꦶꦤꦶꦁ​ꦲꦶꦁ​ꦥꦤꦼꦏꦸꦁ꧈​​ꦩꦸꦤꦶ​ꦱꦗꦿꦺꦴꦤꦶꦁ​ꦏꦸꦂꦄꦤ꧀꧈​​ꦲꦤ꧀ꦠꦩꦸꦠꦸ​ꦏꦧ꧀ꦭꦭ꧀​ꦩꦲꦺꦴꦠ​ꦥꦸꦤꦶꦏꦸ꧈​​ꦭꦶꦫꦶꦁ​ꦩꦠꦶ​ꦗꦿꦺꦴꦤꦶꦁ​ꦒꦼꦱꦁ꧈​​ꦲꦶꦪ​ꦒꦼꦱꦁ​ꦗꦿꦺꦴꦤꦶꦁ​ꦥꦠꦶ꧉​​
​ꦏꦁ​ꦩꦁꦏꦤ​ꦱꦪꦼꦏ꧀ꦠꦶꦚ꧈​​ꦥꦶꦭꦶꦃ​ꦗꦤ꧀ꦩ​ꦏꦁ​ꦧꦁꦏꦶꦠ꧀​ꦲꦔ꧀ꦭꦏꦺꦴꦤꦶ꧈​​ꦱꦏꦶꦁ​ꦲꦔꦺꦭ꧀​ꦱꦏꦭꦁꦏꦸꦁ꧈​​ꦏꦭꦩꦸꦤ꧀​ꦢꦸꦫꦸꦁ​ꦲꦼꦏꦱ꧀꧈​​ꦥꦔꦼꦏꦼꦱꦶꦁ​ꦲꦶꦏ꧀ꦠꦺꦏꦠ꧀​ꦱꦪꦼꦏ꧀ꦠꦶ​ꦠꦏꦸꦠ꧀꧈​​ꦲꦺꦮꦢꦺꦤꦺ​ꦏꦼꦤ​ꦲꦸꦒ꧈​​ꦒꦶꦤꦸꦭꦔ​ꦩꦸꦫꦶꦃ​ꦭꦤ꧀ꦠꦶꦃ꧉​​
​ꦢꦺꦤꦺ​ꦠ​ꦥꦸꦂꦮꦺꦁ​ꦥꦔꦫꦃ꧈​​ꦫꦃ​ꦲꦫꦲꦼꦤ꧀​ꦱꦼꦱꦶꦫꦶꦃ​ꦱꦧꦼꦤ꧀​ꦲꦫꦶ꧈​​ꦲꦚꦼꦚꦸꦢ​ꦲꦮ​ꦤꦥ꧀ꦱꦸ꧈​​ꦪꦺꦤ꧀​ꦮꦸꦱ꧀​ꦔꦿꦱ​ꦏꦮꦱ꧈​​ꦏꦭꦩꦁꦱ​ꦱꦶꦉꦥꦶꦁ​ꦮꦺꦴꦁ​ꦭꦶꦁꦱꦶꦂ​
​ꦢꦭꦸ꧈​​ꦔꦸꦁꦱ​ꦒꦺꦴꦤ꧀​ꦏꦁ​ꦥꦿꦪꦺꦴꦒ꧈​​ꦥꦥꦤ꧀​ꦏꦁ​ꦥꦏꦤ꧀ꦠꦸꦏ꧀​ꦱꦼꦥꦶ꧉​​
​ꦤꦸꦭꦾ​ꦔꦿꦕꦸꦠ꧀​ꦥꦚ꧀ꦕꦢꦿꦶꦪ꧈​​ꦏ꧀ꦮꦱꦤꦶꦫ​ꦱꦶꦂꦤꦏ꧀ꦤ​ꦪ꧀ꦮ​ꦭꦸꦩꦫꦶꦱ꧀꧈​​ꦤꦺꦠꦿ​ꦭꦶꦪꦼꦥꦼꦤ꧀​ꦲꦤꦸꦗꦸ꧈​​ꦒꦿꦤꦶꦁ​ꦲꦂꦒ​ꦠꦸꦂ​ꦱꦺꦤ꧈​​ꦥꦿꦩꦤꦤ꧀ꦠ​ꦮꦺꦴꦂꦤ​ꦭꦶꦪꦼꦥꦶꦁ​ꦥꦤ꧀ꦢꦸꦭꦸ꧈​​ꦩꦸꦭꦠ꧀​ꦭꦸꦩꦏ꧀ꦱ​ꦤꦺꦁ​ꦲꦺꦴꦱ꧀ꦮ꧈​​ꦢꦺꦤ꧀​ꦱꦤ꧀ꦠꦺꦴꦱ​ꦪ꧀ꦮ​ꦒꦸꦩꦶꦁꦱꦶꦂ꧉​​
​ꦢꦾꦤ꧀​ꦤꦠ​ꦭꦏ꧀ꦱꦶꦠꦺꦁ​ꦲꦺꦴꦱ꧀ꦮ꧈​​ꦩꦃꦪ​ꦩꦚ꧀ꦗꦶꦔꦶꦫ​ꦢꦺꦤ꧀​ꦱꦫꦺꦃ​ꦫꦶꦫꦶꦃ꧈​​ꦮꦶꦤꦮꦱ꧀​ꦪ꧀ꦮ​ꦏꦺꦴꦁꦱꦶ​ꦮꦺꦴꦂ​ꦱꦸꦃ꧈​​ꦮꦺꦴꦂ​ꦭꦶꦪꦼꦥꦶꦁ​ꦥꦤꦶꦔꦭ꧀꧈​​ꦢꦺꦤ꧀​ꦒꦸꦩꦺꦴꦭꦺꦴꦁ​ꦊꦔꦶꦁ​ꦠꦾꦱ꧀​ꦠꦤ꧀ꦠꦫ​ꦠꦩ꧀ꦠꦸ꧈​​ꦫꦱꦤꦶꦁ​ꦲꦁꦒ​ꦏꦫꦱ꧈​​ꦗꦿꦺꦴ​ꦫꦺꦴꦱ꧀​ꦫꦺꦴꦱꦤ꧀​ꦏꦺꦁꦱꦼꦂ​ꦏꦺꦴꦱꦶꦏ꧀꧉​​
​ꦏꦠꦫꦶꦏ꧀​ꦤꦼꦔꦶꦁ​ꦥꦶꦫꦤ꧀ꦠꦾ꧈​​ꦠꦤ꧀​ꦲꦤ꧀ꦠꦫ​ꦒꦸꦩꦽꦩꦼꦠ꧀​ꦩꦫ​ꦩꦫꦶꦁ꧈​​ꦩꦫꦏ꧀​ꦮꦺꦴꦂ​ꦲꦺꦴꦱ꧀ꦮ​ꦫꦸꦩꦱꦸꦏ꧀꧈​​ꦪ꧀ꦮ​ꦮꦱ꧀​ꦢꦺꦤ꧀​ꦠꦼꦠꦼꦏ꧀​ꦱꦶꦫ꧈​​ꦱꦼꦫꦶꦁ​ꦫꦱ​ꦏꦫꦱ​ꦠꦿꦸꦱꦶꦁ​ꦱꦼꦱꦸꦁꦱꦸꦩ꧀꧈​​ꦱꦩꦤ꧀ꦠꦫ​ꦫꦱꦤꦶꦫ꧈​​ꦮꦺꦴꦫꦶꦁ​ꦥꦔꦿꦱ​ꦱꦶꦂꦤꦤꦶꦱ꧀꧉​​
​ꦏꦫꦶ​ꦏꦭꦫꦠꦶꦁ​ꦲꦠ꧀ꦩ꧈​​ꦮꦺꦴꦫꦶꦁ​ꦮꦂꦤ​ꦫꦸꦥ​ꦮꦸꦱ꧀​ꦩꦸꦭꦾ​ꦠꦸꦁꦒꦶꦭ꧀꧈​​ꦠꦸꦁꦒꦶꦭ꧀​ꦲꦶꦁ​ꦏꦴꦤꦤꦶꦥꦸꦤ꧀꧈​​ꦲꦤꦤꦶꦁ​ꦏꦤꦶꦔꦤ꧀꧈​​ꦏꦺꦴꦤꦁ​ꦲꦺꦴꦤꦁ​ꦩꦺꦤꦏ꧀​ꦲꦶꦁ​ꦏꦤꦶꦏ꧀ꦩꦠꦤ꧀​ꦤꦸꦁ꧈​​ꦲꦶꦁ​ꦏꦺꦴꦤꦺꦴ​ꦱꦏꦂꦱꦤꦶꦫ꧈​​ꦢꦺꦫ​ꦩꦿꦶꦃ​ꦏꦂꦏꦠꦶꦁ​ꦏꦥ꧀ꦠꦶ꧉​​
​ꦱꦪꦼꦏ꧀ꦠꦶ​ꦮꦸꦱ꧀​
​ꦏꦠꦫꦶꦩ꧈​​ꦏꦁ​ꦤꦫꦶꦩ​ꦲꦤꦤꦶꦫ​ꦥꦿꦶꦧꦢꦶ꧈​​ꦮꦶꦠ꧀​ꦮꦸꦱ꧀​ꦥꦮꦺꦴꦫꦶꦁ​ꦱꦮꦸꦗꦸꦠ꧀꧈​​ꦫꦺꦴꦫꦺꦴ​ꦫꦺꦴꦫꦺꦴꦤꦶꦁ​ꦠꦸꦁꦒꦭ꧀꧈​​ꦠꦸꦁꦒꦭꦶꦫ​ꦩꦏ꧀ꦱꦶꦃ​ꦏꦼꦏꦭꦶꦃ​ꦥꦸꦤꦶꦏꦸ꧈​​ꦩꦂꦒ​ꦭꦒꦶ​ꦥꦤꦸꦁꦒꦭ꧀ꦚ꧈​​ꦱꦗꦿꦺꦴꦤꦶꦁ​ꦩꦢꦾ​ꦥꦸꦤꦶꦏꦶ꧉​​
​ꦢꦸꦫꦸꦁ​ꦠꦸꦁꦒꦭ꧀​ꦲꦶꦁ​ꦮꦱꦤ꧈​​ꦩꦂꦩꦤꦶꦫ​ꦩꦏ꧀ꦱꦶꦃ​ꦮꦁꦱꦸꦭ꧀​ꦏꦼꦏꦭꦶꦃ꧈​​ꦭꦶꦂ​ꦏꦽꦱ꧀ꦤ​ꦏꦭꦮꦤ꧀​ꦮꦶꦱ꧀ꦤꦸ꧈​​ꦭꦩꦸꦤ꧀​ꦏꦽꦱ꧀ꦤ​ꦏꦠꦶꦔꦭ꧀꧈​​ꦱꦁ​ꦲꦾꦁ​ꦮꦶꦱ꧀ꦤꦸ​ꦱꦪꦼꦏ꧀ꦠꦶꦤꦺ​ꦠꦤ꧀​ꦏꦢꦸꦭꦸ꧈​​ꦪꦺꦤ꧀​ꦮꦶꦱ꧀ꦤꦸ​ꦤꦺꦁ​ꦱꦸꦫꦭꦪ꧈​​ꦧꦛꦫ​ꦏꦽꦱ꧀ꦤ​ꦠꦤ꧀​ꦏꦺꦏ꧀ꦱꦶ꧉​​
​ꦤꦔꦶꦁ​ꦏꦽꦱ꧀ꦤ​ꦲꦶꦪ​ꦏꦽꦱ꧀ꦤ꧈​​ꦮꦶꦱ꧀ꦤꦸꦤꦶꦫ​ꦮꦶꦱ꧀ꦤꦸ​ꦱꦗꦠꦶ꧈​​ꦧꦺꦢ​ꦥꦩꦺꦴꦫꦶꦁ​ꦔꦭꦸꦪꦸꦠ꧀꧈​​ꦏꦽꦱ꧀ꦤ​ꦱꦶꦂꦤ​ꦮꦭꦸꦪ꧈​​ꦥꦸꦭꦶꦃ​ꦮꦶꦱ꧀ꦤꦸ​ꦔꦪꦔꦤ꧀​ꦱꦭꦩꦶꦤꦶꦥꦸꦤ꧀꧈​​ꦩꦂꦩ​ꦥꦤꦸꦁꦒꦭꦶꦁ​ꦩꦢꦾ꧈​​ꦩꦸꦁ​ꦲꦫꦤ꧀​ꦒꦩ꧀ꦧꦸꦃ​ꦲꦶꦁ​ꦮꦶꦢꦶ꧉​​  
꧅ꦟ꧀ꦢꦿ꧅
ꦪ​ꦱꦶꦁ​ꦒꦠꦸꦁꦒꦭ꧀​ꦭꦒꦸ꧈​​ꦥꦤꦼꦏꦸꦔꦤ꧀​ꦏꦁ​ꦏꦺꦴꦕꦥ꧀​ꦲꦶꦁ​ꦥꦁꦏꦸꦂ꧈​​ꦭꦤ꧀​ꦥꦔꦸꦏꦸꦠ꧀​ꦥꦔꦿꦕꦸꦠ꧀​ꦥꦠꦿꦥꦶꦁ​ꦥꦠꦶ꧈​​ꦩꦸꦁ​ꦧꦺꦢ​ꦩꦱꦺꦱ​ꦲꦶꦏꦸ꧈​​ꦮꦶꦤꦱꦺꦱ​ꦥꦿꦥ꧀ꦠꦺꦁ​ꦭꦪꦺꦴꦤ꧀꧉​​
ꦢꦺꦤꦺ​ꦥꦠꦿꦥꦶꦁ​ꦭꦩ꧀ꦥꦸꦱ꧀꧈​​ꦮꦱꦶꦠꦤꦺ​ꦥꦿ​ꦮꦶꦏꦸ​ꦏꦁ​ꦥꦸꦠꦸꦱ꧀꧈​​ꦥꦮꦂꦠꦶꦤꦺ​ꦲꦤ꧀ꦠꦫ​ꦏꦸꦫꦁ​ꦠꦿꦶ​ꦱꦱꦶ꧈​​ꦫꦱꦤꦶꦁ​ꦫꦱ​ꦮꦸꦱ꧀​ꦱꦸꦫꦸꦠ꧀꧈​​ꦱꦸꦉꦩ꧀​ꦱꦸꦩꦶꦫꦠ꧀​ꦲꦶꦁ​ꦫꦲꦺꦴꦱ꧀꧉​​
ꦤꦸꦤ꧀ꦠꦸꦤ꧀​ꦏꦂꦏꦠꦶꦁ​
​ꦏꦭ꧀ꦧꦸ꧈​​ꦱꦩꦸꦧꦫꦁ​ꦏꦁ​ꦏꦩ꧀ꦧꦃ​ꦏꦴꦩ꧀ꦧꦸ꧈​​ꦏꦼꦩ꧀ꦧ​ꦏꦼꦩ꧀ꦧ​ꦏꦸꦩꦩ꧀ꦧꦁ​ꦠꦤ꧀​ꦩꦭ꧀ꦧꦺꦁ​ꦧꦸꦢꦶ꧈​​ꦩꦿꦶꦁ​ꦏꦧꦸꦢꦪꦤ꧀​ꦠꦸꦩꦩ꧀ꦧꦸꦃ꧈​​ꦲꦧꦼꦂ​ꦧꦺꦫꦮꦤꦶꦁ​ꦧꦠꦺꦴꦱ꧀꧉​​
ꦪꦺꦤ꧀​ꦮꦸꦱ꧀​ꦩꦁꦏꦺꦴꦤꦺꦴ​ꦠꦩ꧀ꦠꦸ꧈​​ꦲꦤ꧀ꦠꦫ​ꦫꦶ​ꦱꦿꦤ꧀ꦢꦸꦤꦶꦁ​ꦲꦁꦒꦩꦸ꧈​​ꦲꦤ​ꦲꦶꦁꦏꦁ​ꦏꦿꦱ​ꦭꦫ​ꦱꦭꦃ​ꦱꦶꦏꦶ꧈​​ꦲꦼꦩ꧀ꦧꦸꦃ​ꦥꦶꦊꦏ꧀​ꦮꦠꦸꦏ꧀​ꦔꦼꦭꦸ꧈​​ꦩꦸꦊꦱ꧀​ꦭꦸꦁꦏꦿꦃ​ꦠꦾꦱ꧀​ꦏꦊꦱꦺꦴꦤ꧀꧉​​
ꦪꦺꦤ꧀​ꦮꦸꦱ꧀​ꦩꦁꦏꦺꦴꦤꦺꦴ​ꦏꦸꦭꦸꦥ꧀꧈​​ꦲꦪ꧀ꦮ​ꦲꦸꦭꦥ꧀​ꦏꦸꦩꦼꦭꦧ꧀​ꦲꦶꦁ​ꦏꦭ꧀ꦧꦸ꧈​​ꦏꦧꦺꦃ​ꦧꦫꦁ​ꦏꦁ​ꦢꦢꦶ​ꦠꦿꦶꦱ꧀ꦤꦤꦶꦁ​ꦲꦠꦶ꧈​​ꦩꦾꦁ​ꦱꦭ꧀ꦮꦶꦫꦶꦁ​ꦏꦉꦩꦩꦸ꧈​​ꦧꦶꦫꦠꦼꦤ꧀​ꦲꦪ꧀ꦮ​ꦏꦠꦺꦴꦁꦠꦺꦴꦤ꧀꧉​​
ꦩꦭꦃ​ꦤꦸꦭꦾ​ꦩꦿꦶꦃ​ꦭꦏꦸ꧈​​ꦲꦤꦶꦂꦤꦏ꧀ꦤ​ꦏꦧꦺꦃ​ꦲꦮ​ꦤꦥ꧀ꦱꦸ꧈​​ꦭꦶꦫꦶꦁ​ꦲꦮ​ꦏꦧꦺꦃ​ꦥꦼꦥꦺꦔꦶꦤꦤ꧀​ꦏꦏꦶ꧈​​ꦤꦼꦥ꧀ꦱꦸ​ꦢꦼꦢꦸꦏ​ꦥꦸꦤꦶꦏꦸ꧈​​ꦏꦭꦩꦸꦤ꧀​ꦧꦁꦏꦶꦠ꧀​ꦩꦁꦏꦺꦴꦤꦺꦴ꧉​​
ꦏꦮꦂꦠꦶ​ꦮꦸꦱ꧀​ꦠꦂꦠꦩ꧀ꦠꦸ꧈​​ꦠꦤ꧀​ꦏꦫꦱ​ꦫꦱꦤꦶꦁ​ꦭꦫꦩꦸ꧈​​ꦩꦸꦁ​ꦏꦫꦱ​ꦱꦿꦶꦫ​ꦊꦱꦃ​ꦱꦮꦠꦮꦶꦱ꧀꧈​​ꦠꦼꦩꦃ​ꦮꦱ꧀ꦥꦢꦺꦁ​ꦥꦤ꧀ꦢꦸꦭꦸ꧈​​ꦠꦤ꧀​ꦮꦱ꧀​ꦥꦩꦮꦱꦶꦁ​ꦧꦠꦺꦴꦱ꧀꧉​​
ꦱꦏꦶꦁ​ꦉꦱꦶꦏ꧀​ꦠꦾꦱꦶꦥꦸꦤ꧀꧈​​ꦩꦿꦶꦁ​ꦥꦼꦥꦸꦠꦺꦴꦤ꧀​ꦩꦤ꧀ꦠꦼꦥ꧀​ꦠꦤ꧀​ꦠꦸꦩ꧀ꦥꦁ​ꦱꦸꦃ꧈​​ꦢꦾꦤ꧀​ꦲꦪ꧀ꦮ​ꦱꦃ​ꦔꦺꦱ꧀ꦛꦶ​ꦮꦺꦴꦫꦶꦁ​ꦏ꧀ꦮꦸꦭ​ꦒꦸꦱ꧀ꦠꦶ꧈​​ꦭꦶꦂ​ꦏꦗꦂꦮꦺꦁ​ꦱꦼꦏꦂ​ꦥꦁꦏꦸꦂ꧈​​ꦩꦿꦶꦃ​ꦪ꧀ꦮ​ꦏꦺꦫꦺꦴꦤ꧀​ꦥꦿꦥ꧀ꦠꦤꦶꦁ​ꦢꦺꦴꦤ꧀꧉​​
ꦪꦺꦤ꧀​ꦮꦸꦱꦶꦁ​ꦏꦺꦏ꧀ꦱꦶ​
​ꦏꦺꦴꦤꦸꦱ꧀꧈​​ꦏꦩꦤꦸꦁꦱꦤꦶꦫ​ꦱꦪꦼꦏ꧀ꦠꦶ​ꦮꦸꦱ꧀꧈​​ꦱꦪ​ꦥꦉꦏ꧀​ꦥꦿꦥ꧀ꦠꦤꦶꦁ​ꦲꦤ꧀ꦠꦫꦺꦁ​ꦥꦠꦶ꧈​​ꦢꦺꦤ꧀​ꦥꦠꦶꦠꦶꦱ꧀​ꦥꦩꦮꦱ꧀ꦩꦸ꧈​​ꦮꦮꦱꦼꦤ꧀​ꦢꦶꦥꦸꦤ꧀​ꦮꦱ꧀ꦥꦲꦺꦴꦱ꧀꧉​​
​ꦲꦶꦏꦸ​ꦩꦁꦏ​ꦥꦤꦸꦤ꧀ꦠꦸꦤ꧀꧈​​ꦱꦱ꧀ꦩꦶꦠꦺꦁ​ꦲꦾꦁ​ꦲꦶꦁꦏꦁ​ꦩꦲ​ꦄꦒꦸꦁ꧈​​ꦲꦪ꧀ꦮ​ꦒꦶꦁꦒ​ꦒꦸꦭꦔꦼꦤ꧀​ꦒꦸꦭꦸꦔꦤꦺꦏꦶ꧈​​ꦧꦺꦚ꧀ꦗꦁ​ꦪꦺꦤ꧀​ꦮꦸꦱ꧀​ꦥꦿꦥ꧀ꦠꦺꦁ​ꦭꦩ꧀ꦥꦸꦱ꧀꧈​​ꦲꦶꦏꦸ​ꦩꦭꦶꦃ​ꦱꦥꦠꦼꦩꦺꦴꦤ꧀꧉​​
​ꦪꦺꦤ꧀​ꦮꦸꦱ꧀​ꦊꦱꦃ​ꦲꦁꦒꦩꦸ꧈​​ꦒꦾ​ꦥꦱꦿꦲ​ꦩꦥꦤ꧀​ꦏꦁ​ꦥꦏꦤ꧀ꦠꦸꦏ꧀꧈​​ꦭꦶꦂ​ꦩꦤꦼꦏꦸꦁ​ꦏꦪ​ꦏꦁ​ꦏꦮꦃꦪꦺꦁ​ꦔꦂꦱꦶ꧈​​ꦔꦿꦏꦼꦠ​ꦤꦼꦔꦶꦁ​ꦥꦔꦸꦏꦸꦠ꧀꧈​​ꦩꦾꦁ​ꦥꦔꦿꦕꦸꦠ꧀​ꦲꦪ꧀ꦮ​ꦏꦺꦫꦺꦴꦤ꧀꧉​​
​ꦪꦼꦏ꧀ꦠꦶ​ꦠꦤ꧀ꦠꦫ​ꦢꦔꦸ꧈​​ꦱꦸꦉꦩ꧀​ꦱꦼꦱꦸꦤꦫꦶꦁ​ꦥꦿꦩꦤꦩꦸ꧈​​ꦏꦠꦸꦠ꧀​ꦢꦺꦤꦶꦁ​ꦏꦱꦠꦶꦁ​ꦏꦁ​ꦠꦶꦂꦠ​ꦮꦼꦤꦶꦁ꧈​​ꦲꦶꦪ​ꦠꦶꦂꦠ​ꦏꦩꦤ꧀ꦝꦤꦸ꧈​​ꦲꦶꦁ​ꦏꦺꦴꦤꦺꦴ​ꦢꦶꦥꦸꦤ꧀​ꦩꦶꦫꦤ꧀ꦠꦺꦴꦱ꧀꧉​​
​ꦲꦺꦩ꧀ꦥꦏ꧀ꦤ​ꦥꦼꦥꦸꦤ꧀ꦠꦺꦴꦤ꧀ꦩꦸ꧈​​ꦥꦔꦿꦏꦶꦠꦶꦁ​ꦔꦸꦏꦸꦠ꧀​ꦪ꧀ꦮ​ꦏꦭꦶꦩ꧀ꦥꦸꦠ꧀꧈​​ꦱꦉꦔꦤ​ꦥꦼꦠꦶꦁ​ꦥꦿꦩꦤ​ꦢꦺꦤ꧀​ꦲꦒ꧀ꦭꦶꦱ꧀꧈​​ꦥꦸꦥꦸꦠ꧀​ꦮꦸꦱ꧀​ꦭꦪꦸ​ꦑꦪꦥ꦳ꦸ꧈​​ꦠꦼꦭꦱ꧀​ꦮꦱꦶꦠꦤꦶꦁ​ꦩꦲꦺꦴꦠ꧀꧉​​
ꦠꦩꦠ꧀꧉​
1. Mangèsthi wruh srirèng Hyang Artati | têtumanên patêmon wartanya | tanpa pantaran nikmate | sor langêning salulut | marmanira kang sampun uning | kasat mata ing netya | sumèh sêmunipun | ayêm têntrêm anarima | mungkur maring karamèn mung amalatsih | sihing Hyang Suksmanasa ||

 2. ngunjara ring rêrasan tan aris | sanityasa sung srêping sasama | sarèh saniskaraning rèh | ririh paramarta rum | santa budya susêtyèng kapti | katênta mètotaman | têtêk santosatul | saking tyase wus pranawa | anarawang manrusing pramana wêning | wruh nênging kaêningan ||

 3. wiwaraning warana kang wêrit | kinawruhan wêngane tan samar | kasarira saarine | wruh rahayuning luyut | yitna nora kewran ing wèsthi | mangkana kang waskitha | marma dèn anggayuh | wahyu ayuning kasidan | ywa katungkul ulah kamulyaning urip | tan urup kinurêpan ||

 4. jatinira ananing aurip | nora lama bêbasane ana | amung sagêbyaring clèrèt | pêt tumulia wangsul | bagya lamun kang bangkit bali | maring alame lama | kang luwih linuhung | wit gaib kang durung wikan | kang wus tamtu pêtêng calèrèt umanjing | suwung woring swasana ||

 5. yayah lêbu katiyup ing angin | paran kulup yèn nèng kono sira | kasangsaya salawase | awit wêwarahipun | wrêdatama kang wus mumpuni | yèn maring suwung sira | mung pêtêng tinêmu | tanpa têpi katêmahan | tuju padhang kêna gêbyaring hyang rawi | mawa prabawa panas ||

 6. kaingkêtan surya pêtêng malih | ana uga sunaring sasôngka | nanging mung sawatarane | tur mawa prabawa bun | sangêt asrêp karasèng dhiri | yèn sira mring swasana | swasana puniku | amung angin ananira | wor alusing ponang tirta lawan agni | tur uga maksih kêna ||

 7. wuwuh sunaring surya lan sasi | paran kulup solahira benjang | tansah panas asrêp bae | myang katiyupi bayu | angalaya ngubêngi langit | anginjêng tanpa sotya | iku aranipun | karsa ngungsi ngêndi sira | trilokaya kêbak kalimputan dening | ing suwung myang swasana ||

 8. layak lamun kang durung udani | arsa marêm nèng suwung kewala | dumèh mêngku sakabèhe | tan wruh lamun puniku | pêtêng kêmput tanpa watawis | kang rêmpit kalimputan | têmah nyanuk-nyanuk | wênèh anganggêp swasana | dumèh alus anglimputi ganal alit | lêmbut ngèbêki jagad ||

 9. nanging tan wruh yèn iku trimurti | tri têtêlu murti kaalusan | alus têtêlu têgêse | liring alus têtêlu | adhêm panas kalawan angin | iku ananing hawa | nguni asalipun | ingkang panas saking surya | ingkang asrêp asal saking sitarêsmi | angin saking tranggana ||

 10. tataning kang surya lintang sasi | samya mubêng nyakra magilingan | urun prabawa katrine | wor dadya swasanèku | môngka wrananira Hyang Widi | dera marnèng kaanan | sèsining rat sagung | dumunung mring suwungira | li sêsotya munggwing êmbanan salami | tan kêna pinisahna ||

 11. mantuk têtêp tanpa kartinèki | kamot momot among amisesa | saisining jagad kabèh | bumi baruna klêbu | nora mrojol saking trimurti | isine kaisenan | ing saananipun | anglimputi kalimputan | pêpêt tanpa watêsan pênuh trimurti | tuhu amisesèng rat ||

 12. trilokaya tan ana kang mirip | lir swasana prandene punika | maksih kawula jatine | katandha ananipun | durung langgêng nora nêng êning | pan maksih darbe obah | kêna suda wuwuh | têtêp mung bôngsa pirantya | dadi dudu anane kaanan jati | jati-jatining gêsang ||

 13. balik kang ran sajatining urip | sayêktine mênêng nora obah | nanging ingkang obah kabèh | yèn nora lan nêngipun | wurung nora sida amosik | lan tan rupa tan warna | nanging jatinipun | sabên-sabên ana warna | pan wus lawan rupanira kang sajati | kalamun tanpa rupa ||

 14. yatnanana yêkti nora warni | warna rupa nora bisa pisah | warna warana têgêse | rupa urip satuhu | dadi warna kabèh puniki | têtêp waranèng gêsang | kang misesèng suwung | suwung kang woring jiwangga | ulatana sumingite anèng ngêndi | aja mucung kewala ||

 2. Pocung

 1. nguni ingsun ngênglêng ing tyas pungun-pungun | ngudi ananing Hyang | gya pruhita pra maharsi | wêwarahe tan sama awarna-warna ||

 2. ana wiku mêdhar ananing Hyang Agung | yaiku cahyanta | kang nglimputi woring dhiri | wayangannya dumunung nèng netranira ||

 3. bundêr nguwung lir sunaring surya nrawung | aran nur Mukhamat | yèn prapta antarèng pati | iku surêm yèn sirêp sira palastra ||

 4. marmanipun yèn wus surut urupipun | aywa was sumêlang | ling-lingên ywa kongsi lali | pilutanên ing kono gwaning kamulyan ||

 5. ana muwus wosing gêsang sayêkti wus | kawasesèng sira | woring sarira ri ratri | iya iku rasa lan pangrasanira ||

 6. wor sawujud nèng napas anpas tan nupus | pratandhane ana | yèn napasira wus anis | yêkti sirna atmanira saking raga ||

 7. marmaningpun yèn sira yun praptèng luyut | aywa kalayatan | oswanta racutên nuli | worna lawan rasa lan pangrasanira ||

 8. pangrasèku anane Gusti saèstu | kawula rasanta | yèn rasa lan pangrasa wis | wor sajuga têtêp ing panunggalira ||

 9. sirna sampun tanpa rasa pangrasa wus | mulih mulanira | duk sira durung dumadi | bali nêng ning nora muni nora muna ||

 10. wênèh muwus jatine kang murwèng idhup | yaiku pramana | kang masesa ing sakalir | dumunungnya nèng Utyaka Guruloka ||

 11. iya iku têmbung Arab Betal Makmur | tandhane kang nyata | anèng gêbyaring pangèksi | lwih waspada wruh gumlaring alam dunya ||

 12. yèn puniku lêrêm sira nuli turu | yèn sirna palastra | mulane èsthine kaki | mung pramana kang bisa nuntun mring swarga ||

 13. wênèh jamhur amarna kang maha ruhur | yaiku suwara | kang kuwasa murwèng urip | pratandhane lamun sirna swaranira ||

 14. praptèng lampus mênêng nora bisa muwus | sawênèh pandhita | mêjang ananing Hyang Widi | iya iku angên-angên bale atma ||

 15. nèng jro jantung jênak jênjêm anjêjangkung | sakrêjêting sêja | rasa pangrasa cipta sir | pôncamaya pôncadriya kawasesa ||

 16. marma yèn wus prapta antaraning lampus | angên-angênira | nêngna aywa mobah mosik | rasanira sirnakna mring kono poma ||

 17. yêkti nêmu sajatine kaananmu | tan susah sinêdya | pan wus manggih sawargadi | têmah nikmat mufangat salaminira ||

 18. wênèh nuduh jatining urip dumunung | anèng sulbinira | papan kanikmatan yêkti | purwèng urip saking kono sangkanira ||

 19. marma besuk yèn wus arsa praptèng layu | ing pangèsthinira | dumunungna anèng sulbi | yêkti mulya waluya mring uripira ||

 20. tur amêngku salwiring rasa sadarum | mung nikmat mufangat | salamêt salami-lami | langgêng urip môngka witing rasa mulya ||

 21. wênèh sung wruh jatining Gusti wus karuh | benjang lamun sira | wus parêk antarèng pati | ana rupa kadya rupanta priyôngga ||

 22. kang akonus saking kamanungsanta wus | saplak nora siwah | amung mawa cahya putih | iya iku kang aran mayangga seta ||

 23. lamun iku wus kadulu ing sirèku | ciptaa anunggal | sêjakna gênti umanjing | dadi têtêp warôngka manjing curiga ||

 24. rampung putus wus tan ana kang winuwus | têtêp ing panunggal | panunggaling kwula gusti | mulih mulya tan ana gusti kawula ||

 25. wênèh wiku ngaku wikan kang amêngku | wus tanpa wêweka | benjang mèh prantaning pati | ana cahya seta prapta gêng sasada ||

 26. iya iku nur Mukhamat kang satuhu | uriping manusa | wawasên aywa gumisir | tut wurinên tan antara yêkti muksa ||

 27. namu-namu mring wiyat nuksma dumunung | ananing tranggana | yèku cahya kang nêlahi | ing buwana wus langgêng kaananira ||

 28. malih asung tuduh ananing Hyang Agung | cahya maya-maya | jumênêng munggwing ograning | tuntung driya anartani trilokaya ||

 29. Betal Makmur Betal Mukharam katêlu | ing Betal Mukadas | sumunar praptèng pangèksi | liyêpêna katon ponang cahya maya ||

 30. anarawung warna-warna wor dumunung | liyêping paningal | benjang yèn arsa ngêmasi | cahya ingkang kaèksi sirêp sadaya ||

 31. wit ginulung ing cahya kang nèng jro jantung | waluya ngayangan | nuksmèng cahya kang sajati | kang apadhang gumilang tanpa wayangan ||

 32. langgêng nguwung angèbêki buwanagung | mulih purwanira | duk durung tumurun maring | ngarcapada awarna warana raga ||

 33. malih guru amêjang jatining ngèlmu | ing kamulanira | ananing Hyang Maha Widi | amung sabda gaib wor ing rat warata ||

 34. cahyanipun gumilang-gilang narawung | tanpa wêwayangan | nêlahi sèsining bumi | gya tumurun wor rahsa dadya manungsa ||

 35. marma têmtu yèn prapta antarèng layu | ana cahya prapta | gumilang pindha angganing | tirta munggwing ron lumbu amaya-maya ||

 36. dyan puniku ciptanên dadya sawujud | lawan sabdanira | kang sênêdan samadyaning | ngên-angên ta yêkti waluya sampurna ||

 37. mulya wangsul mring asalira rumuhun | sabda gaib babar | bali angèbêki bumi | tribuwana kêbak bangkit mêgat nyawa ||
3. Mêgatruh

 1. wirayate para wiku kang durung wruh | jatining kaanan jati | kaya kang kawahyè ngayun | kabèh datan ana sisip | bênêr wus nèng raga manggon ||

 2. sabab iku kabèh waranèng Hyang Agung | nguni dug durung dumadi | ya kêkêt rakêt tan kumpul | palikêt nèng nukat ghaip | yayah atunggil sawiyos ||

 3. kadyangganing kang swasana wor lan suwung | nunggal rasa seje wrêni | jatine ywa swasanèku | kang manuksma jroning dhiri | katarik duk murwèng raos ||

 4. rahsanira yayah rena wor salulut | kinêmat sing nikmatnèki |
kamot kang swasana katut | kaanane kang sajati | nèng mani woring sawiyos ||

 5. iya iku purwaning Hyang Maha Agung | amarnèng titah sakalir | saking kalarate korut | kêkêt nèng maningkêm nuli | kumulit ngêmuli kothong ||

 6. tan antara kang suwung nulya kumêdud | katut kang swasana kosik | kasrêg panas lan srêpipun | kumaringêt tri sutèngsi | wus kasat mata sayêktos ||

 7. karsaning Hyang kanyataan dadi wujud | wujuding kang jabang bayi | wanodya tanapi jalu | lawan kang swasana maksih | anèng jro dadi pirantos ||

 8. pirantining manungsa kang alus-alus | lêstari manuksmèng dhiri | ananging pakartinipun | swasana manut piranti | kang awadhag urating wong ||

 9. karsaning Hyang pinerang dadi tri juru | kocap ing Hidayat Jati | kapala ran Betal Makmur | swasana kumringêt dadi | tirta maya nèng jro panon ||

 10. iya aran Tirtamarta Kamandhanu | pardikane banyu urip | loro jroning jaja kasbut | ing Betal Mukharam isi | jêjantung ing jêro kothong ||

 11. mung swasana nèng ngriku manuksmèng suwung | têlu konthol dèn wastani | Betal Mukhadas puniku | mèsi mani madi wadi | ya isis wasana kothong ||

 12. amangsuli pakartining Kamandhanu | tansah amidrawèng dhiri | nurut ing darah lan bayu | kang darah kumêjot kosik | angêbut swasana dados ||

 13. napasing wong mlêbu mêtu lira-liru | lawan swasana ing jawi | dadi têtalining idhup | bôngsa santri amastani | salat daim pujining roh ||

 14. iya iku bêbasane pra linangkung | suwung mêngku ananèki | iya anapas kang winêngku | yèn suwunge jagad iki | mêngku swasana ing kono ||

 15. karoncènên kalamun kabèh tinutur | lir layang Hidayat Jati | ringkêse swasana mau | kang nèng jroning raga dadi | piranti kang alus yêktos ||

 16. kang nèng ruhur dadi cahya pramanèku | mêngku pôncadriya nuli | pêncar bisa ngambu ngrungu | bisa nywara lan mangèksi |
kang anèng têngah kawaos ||

 17. iya dadi pônca maya kang amêngku | rasa pangrasa cipta sir | bangkit nganggit ngira nuju | nyana nyakrabawa tuwin | swasana kang anèng ngisor ||

 18. kwasa mêngku pônca asmara yaiku | witing kasêngsêm sarêsmi | saking pôncadriya tumrun | nuksmèng pônca maya trus mring | pôncasmara mêngku raos ||

 19. ran asmara turida ping kalihipun | asmara tôntra kaping tri | kapat asmara ciptèku | dadine woring sarêsmi | asmaragama kacriyos ||

 20. kabèh môngka kalaratira Hyang Agung | de swasana kang nèng jawi | dadi kaanan sawêgung | teja kuwung kilat thathit | calèrèt jaladara wor ||

 21. mega mêndhung ampak-ampak guntur kêtuk | bayu bajra angin-angin | amun-amun daru pulung | kabèh saisining langit | swasana kang dandos-dandos ||

 22. bumi banyu wrêksa gulma lata lumung | sarupaning kang kumêlip | kang gumrêbêg kang kumrumpyung | tan lyan swasana kang dadi | tuhu swasana kuwaos ||

 23. têtêp dadya wêwakiling Kang Mahagung | kawasa murwèng sakalir | marma pra guru kang tan wruh | ananing kaanan jati | swasana kang salin ênggon ||

 24. nuli padha dèn anggêp Kang Maha Agung | pinangran pinundhi-pundhi | kaya kang kawahyèng pucung | tan wruh yèn iku trimurti | salin gon salin lêlagon ||

 25. salin asma lan salin pangwasanipun | lamun manuksmèng mring cacing | yêkti mung mangkêrêt mulur | yèn manuksmèng walang bangkit | mibêr malêtik mancolot ||

 26. yèn manjing wong bisa nganggit bisa ngidung | têrkadhang bisa udani | maring sajatining idhup | wruh sangkan paraning urip | pangrakiting rèh tan keron ||

 27. marmanira kabèh panganggêping guru | kang padha mangeran maring | rasa pangrasa cahya nung | mangran mring pramana tuwin | mangran swara ciptèng batos ||

 28. kaya ingkang kawahya ing sêkar pucung | sayêkti benjang umanjing | mring swasana moring suwung | arsa ngungsi maring ngêndi | ngarsa wuri dhuwur ngisor ||
4. Pangkur

 1. jaba jêro kaèbêkan | ing swasana sanadyan kang tan ngèlmi | iya manuksmèng mring suwung | kawur ing tawang towang | nora beda lawan ingkang ahli ngèlmu | kalamun nora waspada | dununging kaanan jati ||

 2. sajatining uripira | kang wus awor tan pisah siyang ratri | sajroning Kur'an kasêbut | minkibaril warita | Gusti Allah rakêtan lan rasanipun | lire wus awor sarasa | rasa sajroning ngaurip ||

 3. urip ingkang mawa jiwa | jiwanira môngka warana jati | jatining urip puniku | yêkti tan nganggo nyawa | nora nywara nora gônda nora dulu | nora muna tan ngandika | tanpa rasa pangrasa nir ||

 4. amung nêng êning dyatmika | nèng kaanan ananira pribadi | nanging kabèh kang kadulu | apan wus kauningan | kang karungu wus kapyarsa ing Hyang Agung | kang kaambu wus kagônda | kang nywara kasabda yêkti ||

 5. kang angrasa wus karahsan | inaloha huwasamingwal ngalim | Allah iku jêmbar agung | uninga saniskara | nora samar ya nukat ghaipbulguyup | liring wiji pêpingitan | sumingit ing rahsanèki ||

 6. nanging pilih kang uninga | lamun ora lawan pituduh jati | lafale layu khayapu | tan kêna kaya ngapa | ananira samar tan kêna ginayuh | yèn ora lan wahyuning Hyang | nanging wajibul wujudi ||

 7. lire wajib wujudira | iya aran kayun ila birakin | urip tanpa jiwanipun | mung daya prabawanya | anguripi sèsining buwana sagung | nênge bisa karya obah | kayun ila pindarèni ||

 8. bisa urip rong panggonan | lire urip nèng ngalam kabir sahir | kabèh mung pribadinipun | ing kene kana ana | iya kana kene tan ana nyakuthu | mung sawiji nora owah | langgêng ing salami-lami ||

 9. ana sasmitanirèng Hyang | munyèng kitab Dakhaikul Akhaik | dhingin nitahakên kayu | sajaratul yakina | tuwuh anèng jroning alam adam makdum | ajali abadi ika | têgêse gêsang sajati ||

 10. tumuwuh anèng buwana | ya duk maksih wang nguwung sonyaruri | suwung ing salaminipun | anèng kaanan kita | lah puniku ulatana dèn kapangguh | takokna mring pra pandhita | kang pundhuh pindhaning pati ||

 11. prandene kang wus sampurna | ing pangawruh tan samar woring dhiri | kang ngalingi wus kadulu | mlela tan kalamatan | wruhing prana pambukane tan kaliru | jro liyêp layap karasa | saking prana pranawaning ||

 12. kang mangkono winastanan | sampun pana nungku pudya sêmèdi | maladining ing panêkung | muni sajroning Kur'an | antamutu kablal maota puniku | liring mati jroning gêsang | iya gêsang jroning pati ||

 13. kang mangkana sayêktinya | pilih janma kang bangkit anglakoni | saking angèl sakalangkung | kalamun durung êkas | pangêkêsing iktekat sayêkti takut | ewadene kêna uga | ginulanga murih lantih ||

 14. dene ta purwèng pangarah | rah-arahên sêsirih sabên ari | anyênyuda hawa napsu | yèn wus ngrasa kawasa | kalamôngsa sirêping wong lingsir dalu | ngungsia gon kang prayoga | papan kang pakantuk sêpi ||

 15. nulya ngracut pôncadriya | kwasanira sirnakna ywa lumaris | netra liyêpên anuju | graning arga tur sena | pramananta worna liyêping pandulu | mulat lumaksa nèng oswa | dèn santosa ywa gumingsir ||

 16. dyan nata laksitèng oswa | mahya manjingira dèn sarèh ririh | winawas ywa kongsi wor suh | wor liyêping paningal | dèn gumolong lênging tyas tantara tamtu | rasaning angga karasa | jro ros-rosan kèngsêr kosik ||

 17. katarik nênging pirantya | tan antara gumrêmêt mara maring | marak wor oswa rumasuk | ywa was dèn têtêk sira | sêring rasa karasa trusing sêsungsum | samantara rasanira | woring pangrasa sirnanis ||

 18. kari kalarating atma | woring warna rupa wus mulya tunggil | tunggil ing kaananipun | ananing kaêningan | konang-onang menak ing kanikmatan nung | ing kono sakarsanira | dera mrih karkating kapti ||

 19. sayêkti wus katarima | kang narima ananira pribadi | wit wus paworing sawujut | roro-roroning tunggal | tunggalira maksih kêkalih puniku | marga lagi panunggalnya | sajroning madya puniki ||

 20. durung tunggal ing wasana | marmanira maksih wangsul kêkalih | lir Krêsna kalawan Wisnu | lamun Krêsna katingal | Sang Hyang Wisnu sayêktine tan kadulu | yèn Wisnu nèng Suralaya | Bathara Krêsna tan kèksi ||

 21. nanging Krêsna iya Krêsna | Wisnunira Wisnu sajati | beda pamoring ngaluyut | Krêsna sirna waluya | pulih Wisnu ngayangan salaminipun | marma panunggaling madya | mung aran gambuh ing Widi ||
5. Gambuh

 1. ya sing gatunggal lagu | panêkungan kang kocap ing pangkur | lan pangukut pangracut patraping pati | mung beda masesa iku | winasesa praptèng layon ||

 2. dene patraping lampus | wasitane pra wiku kang putus | pawartine antara kurang tri sasi | rasaning rasa wus surut | surêm sumirat ing raos ||

 3. nuntun karkating kalbu | samubarang kang kambah kaambu | kêmba-kêmba kumambang tan malbèng budi | mring kabudayan tumambuh | abêr berawaning batos ||

 4. yèn wus mangkono tamtu | antara ri sranduning anggamu | ana ingkang krasa lara salah siki | êmbuh pilêk watuk ngêlu | mulês lungkrah tyas kalêson ||

 5. yèn wus mangkono kulup | aywa ulap kumêlab ing kalbu | kabèh barang kang dadi trisnaning ati | myang salwiring karêmamu | biratên aywa katongton ||

 6. malah nulya mrih laku | anirnakna kabèh hawa napsu | liring hawa kabèh pêpenginan kaki | nêpsu dêduka puniku | kalamun bangkit mangkono ||

 7. kawarti wus tartamtu | tan karasa rasaning laramu | mung karasa srira lêsah sawatawis | têmah waspadèng pandulu | tan was pamawasing batos ||

 8. saking rêsik tyasipun | mring pêputon mantêp tan tumpang suh | dyan aywa sah ngèsthi woring kwula gusti | lir kajarwèng sêkar pangkur | mrih ywa keron praptaning don ||

 9. yèn wusing kèksi konus | kamanungsanira sayêkti wus | saya parêk praptaning antarèng pati | dèn patitis pamawasmu | wawasên dipun waspaos ||

 10. iku môngka panuntun | sasmitèng Hyang ingkang Maha Agung | aywa gingga gulangên gulunganèki | benjang yèn wus praptèng lampus | iku malih sapatêmon ||

 11. yèn wus lêsah anggamu | gya pasraha mapan kang pakantuk | lir manêkung kaya kang kawahyèng ngarsi | ngrakêta nênging pangukut | myang pangracut aywa keron ||

 12. yêkti tantara dangu | surêm sêsunaring pramanamu | katut dening kasating kang tirta wêning | iya Tirta Kamandhanu | ing kono dipun mirantos ||

 13. empakna pêpuntonmu | pangrakiting ngukut ywa kalimput | sarêngana pêting pramana dèn aglis | puput wus layu khayafu | têlas wasitaning maot ||

Tamat.

https://wikisource.org/wiki/Jv/Serat_Asmaralaya


Sêrat Asmaralaya


Anyariyosakên bab kawruh kasampurnan, piritan saking wasitaning guru-guru ingkang sami amêdharakên tekating kasidan, kaimpun dhatêng Mas Ngabèi Mangunwijaya, abdi dalêm mantri dhistrik Bayat (Surakarta)

1838-1908

https://asmaralaya.blogspot.co.id/2014/07/serat-asmaralaya.html


===============

asmaralaya

swarga, suwarga, sawarga

swarga

endrabawana, aribawana, asmaralaya, nayapada, rudrabawana, ratibawana, kwana, kamuksan, kamuksapada, kamuksapadan, suralaya, sa(of su)warga, sewalaya, wara, lokabawana, pirdos, para madiwwa, janada, pada, janatun, jagad kamuksan, jagad walikan, muksapada, babat, ngadinin;

===============





Diposting oleh di

Tidak ada komentar:

Posting Komentar

Langganan: Posting Komentar (Atom)